ഓച്ചിറ: കാമുകനും സംഘവും പതിനാറുകാരിയെ  തട്ടിക്കൊണ്ടുപോകാന്‍ ശ്രമിക്കുകയും വീടാക്രമിക്കുകയും ചെയ്ത കേസില്‍ അഞ്ചുപേരെ ഓച്ചിറ പൊലിസ് അറസ്റ്റ് ചെയ്തു. കാമുകനായ ആലുംപീടിക പട്ടശ്ശേരി ജങ്ഷന് സമീപം പുത്തന്‍പുതുവേല്‍ വീട്ടില്‍ മനു (20), സുഹൃത്തുക്കളായ കാവുംങ്കല്‍ പുത്തന്‍വീട് അഖില്‍ (19), പ്രതീഷ് ഭവനത്തില്‍ പ്രതീഷ്(18), മുളയ്ക്കത്തറ മണ്ണേല്‍ വീട്ടില്‍ വിഷ്ണു (18), അനന്തുഭവനത്തില്‍ അനന്തു (18) എന്നിവരെയാണ് അറസ്റ്റ് ചെയ്തത്. എസ്.എസ്.എല്‍.സി വിദ്യാര്‍ഥിനിയായ പെണ്‍കുട്ടി അഴീക്കല്‍ താമസിക്കുന്നതിനിടയില്‍ മനുവുമായി പ്രണയത്തിലാവുകയും രണ്ട് മാസങ്ങള്‍ക്ക് മുന്‍പ് ഇരുവരും ഒളിച്ചോടി പോവുകയും ചെയ്തിരുന്നു.
പിന്നീട് ഇവര്‍ തിരികെ വന്നതോടെ പെണ്‍കുട്ടിയും കുടുംബവും ഓച്ചിറ പായ്ക്കുഴിയില്‍ ഒരു വാടക വീട്ടിലേക്ക് താമസം മാറി. ഇതിനിടെ പെണ്‍കുട്ടി മറ്റ് യുവാക്കളുമായി ലോഹ്യത്തില്‍ ആയെന്ന് മനസിലാക്കിയ മനു സുഹൃത്തുക്കളുമായി ചെന്ന് പെണ്‍കുട്ടിയുടെ വീട് അടിച്ച് തകര്‍ക്കുകയും പെണ്‍കുട്ടിയെ തട്ടിക്കൊണ്ട് പോവുകയുമായിരുന്നുവെന്ന് പൊലിസ് പറയുന്നു. പട്ടശ്ശേരിയിലുള്ള  പുരയിടത്തില്‍ പെണ്‍കുട്ടിയും കാമുകനും സംഘവും നില്‍ക്കുന്നതറിഞ്ഞ് പൊലിസെത്തി സംഘത്തെ പിടികൂടുകയായിരുന്നു. വൈദ്യപരിശോധനയില്‍ പെണ്‍പീഢനത്തിന് വിധേയമായതിനെ തുടര്‍ന്ന് മനുവിന്റെ പേരില്‍ പോക്‌സോ നിയമപ്രകാരം കേസെടുത്ത് അറസ്റ്റ് രേഖപ്പെടുത്തി. സുഹൃത്തുക്കളുടെ പേരില്‍ തട്ടിക്കൊണ്ട് പോകല്‍, വീടാക്രമിക്കല്‍ എന്നിവയുടെ പേരിലും കേസെടുത്തു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.