വഡോദര: പ്രമുഖ ചിത്രകാരന്‍ കെ.ജി സുബ്രഹ്മണ്യന്‍ (92) അന്തരിച്ചു. വഡോദരയില്‍ മകളുടെ വസതിയില്‍ ഇന്നലെ വൈകിട്ടായിരുന്നു അന്ത്യം.
1924 ല്‍ മയ്യഴിയില്‍ ജനിച്ച ഇദ്ദേഹം ഇന്ത്യയുടെ ആധുനിക ചിത്രകാരനായാണ് അറിയപ്പെടുന്നത്. ചിത്രകാരനെന്നതിനു പുറമേ ശില്‍പി, അധ്യാപകന്‍ തുടങ്ങി വ്യത്യസ്ത മേഖലകളില്‍ പ്രവര്‍ത്തിച്ച അദ്ദേഹം കലാഭവന്റെ പ്രിന്‍സിപ്പലായും സേവനമനുഷ്ടിച്ചിട്ടുണ്ട്. കൊല്‍ക്കത്തയിലും ബറോഡയിലുമായാണ് കലാപ്രവര്‍ത്തനം നടത്തിയത്.

പത്മശ്രീ, പത്മഭൂഷണ്‍, പത്മവിഭൂഷണ്‍ എന്നീ ബഹുമതികള്‍ക്കര്‍ഹനായി. സംസ്ഥാന സര്‍ക്കാരിന്റെ രാജാ രവിവര്‍മ പുരസ്‌കാരവും നേടിയിട്ടുണ്ട്.
ചെന്നൈയില്‍ പ്രസിഡന്‍സി കോളജില്‍ ധനതത്വശാസ്ത്രത്തിന് പഠിക്കുമ്പോള്‍ പ്രമുഖ ചിത്രകാരനും ശില്‍പിയും മദ്രാസ് സ്‌കൂള്‍ ഓഫ് ആര്‍ട്‌സ് പ്രിന്‍സിപ്പലുമായ ദേവി പ്രസാദ് റോയ് ചൗധരിയെ പരിചയപ്പെട്ടതാണ് സുബ്രഹ്മണ്യന്റെ ജീവിതത്തില്‍ വഴിത്തിരിവായത്.
തുടര്‍ന്നു ശാന്തിനികേതനില്‍ ചിത്രകല അഭ്യസിച്ചു.