കോഴിക്കോട്: ഭയപ്പെട്ടതുപോലെ നിപാ വൈറസ് സംസ്ഥാനത്തു പടര്‍ന്നിട്ടില്ലെന്ന് ആരോഗ്യ മന്ത്രി കെകെ ശൈലജ. ജനങ്ങള്‍ ആശങ്കപ്പെടേണ്ട കാര്യമില്ല. എന്നാല്‍ നിസ്സാരവല്‍ക്കരിക്കരുത്. ലക്ഷണങ്ങള്‍ കണ്ടാല്‍ ഉടന്‍ ഡോക്ടറെ കാണിക്കണം.

ഇന്നലേയും ഇന്നുമായി വൈറോളജി ലാബിലേക്കയച്ച നിരവധി പേരുടെ രക്ത സാമ്പിളുകളില്‍ ഒരാള്‍ക്കു മാത്രമാണ് വൈറസ് സ്ഥിരീകരിച്ചത്. ബാക്കിയെല്ലാം നെഗറ്റീവ് ആണ്.

രോഗം നിയന്ത്രണ വിധേയമാണ്. 15 പേരില്‍ ഇതുവരെ രോഗം സ്ഥിരീകരിച്ചു. ഇതില്‍ 12 പേര്‍ മരിച്ചു.

നിപാ വൈറസിനെ പ്രതിരോധിക്കുമെന്നു കരുതുന്ന ഹ്യൂമന്‍ മോണോക്ലോണല്‍ ആന്റീബോഡീസ് എന്ന മരുന്ന് ഓസ്‌ട്രേലിയയില്‍നിന്ന് എത്തിച്ചിട്ടുണ്ട്. 50 ഡോസ് ആണ് എത്തിയത്. ഇത് ഉടന്‍ രോഗികള്‍ക്കു കൊടുത്തു തുടങ്ങും.

പേരാമ്പ്രയില്‍ പനി ബാധിച്ചു ആദ്യം മരിച്ച സാബിത്തിനെ നിപാ ബാധിച്ചു മരിച്ചവരില്‍ ഉള്‍പ്പെടുത്തും. സാബിത്തിന്റെ സഞ്ചാര പശ്ചാത്തലം പരിശോധിക്കും. രണ്ടാമത്തെ കേസില്‍ തന്നെ നിപാ വൈറസ് സ്ഥിരീകരിച്ചതിന് ലോകാരോഗ്യ സംഘടന കേരളത്തെ അഭിനന്ദിച്ചതായും മന്ത്രി പറഞ്ഞു.