പന്തീരാങ്കാവ്: ഒളവണ്ണയില്‍ ഇനി കാല്‍പന്ത് കളിയാരവത്തിന്റെ നാളുകള്‍. മാവത്തുംപടി ഗ്രാമപഞ്ചായത്ത് മിനി സ്‌റ്റേഡിയത്തില്‍ ഇന്ന് മുതല്‍ ഒരു മാസം നീളുന്ന സെവന്‍സ് ഫുട്‌ബോള്‍ മേളയില്‍ സംസ്ഥാനത്തെ പ്രമുഖ ഫുട്‌ബോള്‍ ടീമുകളാണ് മത്സരത്തിനെത്തുന്നത്.
      നാലായിരത്തിലധികം കാണികള്‍ക്ക് മത്സരം കാണാനാകുന്ന ഗാലറിയാണ് സജ്ജമാക്കിയത്. 25 ഓളം ടീമുകളാണ് ഒരു മാസത്തിലധികം നീളുന്ന ഫുട്‌ബോള്‍ മേളയില്‍ കളിക്കാനെത്തുന്നത്.
       ഒളവണ്ണ പഞ്ചായത്തിലെ വൃക്ക, അര്‍ബുദ രോഗികള്‍ക്ക് ചികിത്സ സഹായമൊരുക്കുന്നതിനുള്ള ഫണ്ട് സ്വരുപിക്കുന്നതിനാണ് ഫുട്‌ബോള്‍ മേള ലക്ഷ്യമിടുന്നതെന്ന് സംഘാടകരായ ഒളവണ്ണ ഫുട്‌ബോള്‍ അക്കാദമി ഭാരവാഹികള്‍ പറഞ്ഞു. ഇന്ന് വൈകീട്ട് 7.30 ന് നടക്കുന്ന ഉദ്ഘാടന മത്സരത്തില്‍ കെ.ആര്‍.എസ് കോഴിക്കോട് ജിംഖാന തൃശൂരിനെ നേരിടും.