മാള്‍ഡ: പശ്ചിമ ബംഗാളിലെ മാള്‍ഡ ജില്ലയിലുണ്ടായ ചുഴലിക്കാറ്റില്‍ രണ്ടു പേര്‍ മരിച്ചു. നിരവധി പേര്‍ക്ക് പരുക്കേല്‍ക്കുകയും നിരവധി വീടുകള്‍ നശിക്കപ്പെടുകയും ചെയ്തിട്ടുണ്ട്. ഇന്ന് പുലര്‍ച്ചെയായിരുന്നു ചുഴലിക്കാറ്റിന്റെ താണ്ഡവം. മണ്ണിടിച്ചിലില്‍ അകപ്പെട്ടവരാണ് മരിച്ചത്. ഇതില്‍ ഒരാള്‍ അറുപതുകാരനും മറ്റൊരാള്‍ പത്തു വയസുകാരനുമാണ്. രക്ഷാപ്രവര്‍ത്തനം പുരോഗമിക്കുകയാണ്.

ആയിരം വീടുകള്‍ പൂര്‍ണമായും പതിനായിരത്തോളം വീടുകള്‍ ഭാഗികമായും തകര്‍ന്നിട്ടുണ്ട്. ആയിരം ഹെക്ടര്‍ ചോളം,അയ്യായിരം ഹെക്ടര്‍ ഗോതമ്പ്,1500 ഹെക്ടര്‍ ഉരുളക്കിഴങ്ങ്,4250 ഹെക്റ്റര്‍ നെല്ല്,200 ഹെക്റ്റര്‍ പച്ചക്കറി കൃഷി 30 ഏക്കര്‍ തോട്ടകൃഷി എന്നിവ പൂര്‍ണമായും നശിച്ചിട്ടുണ്ട്. പരുക്കേറ്റവരെ സമീപത്തെ ആശുപത്രികളില്‍ പ്രവേശിപ്പിച്ചു. നഷ്ടപരിഹാരം ആവശ്യപ്പെട്ട് സംസ്ഥാന സര്‍ക്കാരിനോട് സഹായം തേടിയിട്ടുണ്ടെന്ന് ജില്ലാ ഭരണകൂടം അറിയിച്ചു.