പെരുമ്പാവൂര്‍: ജിഷ വധക്കേസ് അന്വേഷണത്തില്‍ പൊലിസിന് വീഴ്ച പറ്റിയെന്ന് വിജിലന്‍സിന്റെ കണ്ടെത്തല്‍. കേസ് അന്വേഷണത്തിന്റെ തുടക്കം മുതല്‍ വീഴ്ച സംഭവിച്ചു. കേസില്‍ എഫ്.എ.ആര്‍ തയ്യാറാക്കുമ്പോള്‍ പൊലിസ്  മുന്‍ ധാരണയോട് കൂടിയാണ് പ്രവര്‍ത്തിച്ചതെന്ന് വിജിലന്‍സ് വിലയിരുത്തി.

കേസ് അന്വേഷണം ശരിയായ രീതിയിലല്ല നടക്കുന്നത് എന്ന പരാതിയില്‍ വിജിലന്‍സ് അന്വേഷണം നടത്തിയിരുന്നു. ഈ കുറ്റപത്രവുമായി മുന്നോട്ട് പോയാല്‍ കോടതിയില്‍ നിന്ന് തിരിച്ചടിയുണ്ടാകുമെന്നും വിജിലന്‍സ് ഡയരക്ടര്‍ ജേക്കബ് തോമസ് സര്‍ക്കാറിന് കൈമാറി റിപ്പോര്‍ട്ടിലുള്ളതായും സൂചനയുണ്ട്.


കഴിഞ്ഞ ജനുവരിയിലാണ് വിജിലന്‍സ് റിപ്പോര്‍ട്ട് ആഭ്യന്തര സെക്രട്ടറിക്ക് നല്‍കിയത്. ആഭ്യന്തര സെക്രട്ടറി  റിപ്പോര്‍ട്ട് ഡിജിപിക്കും മുഖ്യമന്ത്രിക്കും കൈമാറി.

എന്നാല്‍ വിജിലന്‍സിന്റെ റിപ്പോര്‍ട്ട് ഡി.ജി.പി തള്ളി. റിപ്പോര്‍ട്ടിലെ കണ്ടെത്തലുകള്‍ ശരിയല്ലെന്ന് ഡിജിപി മറുപടി നല്‍കിയതായാണ് സൂചന. ക്രിമിനല്‍ കേസ് അന്വേ,ണത്തില്‍ വിജിലന്‍സ് അനധികൃതമായി ഇടപെട്ടെന്ന് ഡി.ജി.പി ബി.സന്ധ്യ ആരോപിച്ചു.

കേസുമായി ബന്ധപ്പെട്ട വിചാരണ കോടതിയില്‍ നടന്നു കൊണ്ടിരിക്കുകയാണ്. മാര്‍ച്ച് 13ന് ആരംഭിച്ച വിചാരണയുടെ ആദ്യഘട്ടം ഏപ്രില്‍ അഞ്ചു വരെ നീളും.

കഴിഞ്ഞ ഏപ്രില്‍ 28 നാണ് കുറുപ്പംപടി വട്ടോളിപ്പടിയിലെ കനാല്‍ബണ്ട് പുറമ്പോക്കിലെ ഒറ്റമുറി വീട്ടില്‍ ജിഷ കൊല്ലപ്പെട്ടത്. ആദ്യം പെരുമ്പാവൂര്‍ കോടതിയില്‍ ആരംഭിച്ച കേസ് പിന്നീട് ദലിത് പീഡന നിരോധനനിയമം ചുമത്തിയതിനെത്തുടര്‍ന്ന് എറണാകുളം പ്രിന്‍സിപ്പല്‍ സെഷന്‍സ് കോടതിയിലേക്ക് മാറ്റുകയായിരുന്നു.

ഇക്കഴിഞ്ഞ നവംബര്‍ രണ്ടിന് കേസിന്റെ വിസ്താരം തുടങ്ങാനായിരുന്നു കോടതി നേരത്തെ നിശ്ചയിച്ചിരുന്നത്. എന്നാല്‍ കേസില്‍ തുടരന്വേഷണം ആവശ്യപ്പെട്ട് ജിഷയുടെ പിതാവും കേസ് പഠിക്കാന്‍ സമയം വേണമെന്ന് ആവശ്യപ്പെട്ട് പ്രതി അമീറിന്റെ അഭിഭാഷകനും കോടതിയെ സമീപിച്ചതിനെ തുടര്‍ന്ന് നിരവധി തവണ വിസ്താരം മാറ്റിവയ്ക്കുകയായിരുന്നു.

അഡ്വ. എന്‍. കെ ഉണ്ണികൃഷ്ണനാണ് കേസിലെ സ്‌പെഷല്‍ പ്രോസിക്യൂട്ടര്‍. പ്രതി അമീറിന് വേണ്ടി ഹാജരാകുന്നത് അഡ്വ. ബി. എ ആളൂരാണ്.