പൊന്നാനി: മോഷണം ആരോപിച്ച് ബംഗാളി യുവാവിനെ ഒരു സംഘം ആളുകള്‍ നടുറോഡില്‍ കെട്ടിയിട്ടു മര്‍ദിച്ചു. ഇതിന്റെ ദൃശ്യങ്ങള്‍ സോഷ്യല്‍മീഡിയ വഴി പ്രചരിപ്പിക്കുകയും ചെയ്തിട്ടുണ്ട്. നരിപ്പറമ്പിലെ ഒരു വീട്ടില്‍ പകലില്‍ മോഷണത്തിനു കയറിയെന്നാരോപിച്ചായിരുന്നു മര്‍ദനം.
വസ്ത്രമഴിച്ചു പോസ്റ്റില്‍ കെട്ടിയിട്ടായിരുന്നു മര്‍ദനം. ഒടുവില്‍ പൊന്നാനി പൊലിസിനു കൈമാറി. നേരത്തെ നരിപ്പറമ്പിലെ ഒരു വീട്ടില്‍ തൊഴിലന്വേഷിച്ച് ഇയാള്‍ എത്തിയിരുന്നു. ഇതുപ്രകാരം വീട്ടുകാര്‍ വരാന്‍ പറഞ്ഞിട്ടാണ് ഇയാള്‍ ഇന്നലെ എത്തിയത്. ഇതിനിടയില്‍ ഇയാള്‍ വീട്ടില്‍ അതിക്രമിച്ചു കയറുകയും ഒളിഞ്ഞുനോക്കുകയും ചെയ്തുവെന്ന് ആക്ഷേപമുയര്‍ന്നു. ഇതോടെയാണ് നാട്ടുകാര്‍ കൈകാര്യം ചെയ്തതെന്നു പൊലിസ് പറയുന്നു.
മാസങ്ങള്‍ക്കു മുന്‍പു കുട്ടികളെ തട്ടിക്കൊണ്ടുപോകാന്‍ ശ്രമിച്ചെന്നാരോപിച്ചു മാനസികനില തെറ്റിയ വൃദ്ധനെ പൊന്നാനിയില്‍ നാട്ടുകാര്‍ ക്രൂരമായി മര്‍ദിച്ചിരുന്നു. തുടര്‍ന്നു ചിലര്‍ക്കെതിരേ കൊലക്കുറ്റത്തിനു കേസെടുത്തിരുന്നു.