തിരുവനന്തപുരം: പാമ്പാടി നെഹ്‌റു കോളജ് വിദ്യാര്‍ഥിയായിരുന്ന ജിഷ്ണു പ്രണോയിയുടെ മരണവുമായി ബന്ധപ്പെട്ട എല്ലാ പ്രതികളുടെയും സ്വത്ത് കണ്ടുകെട്ടുമെന്ന് ഡി.ജി.പി ലോക്‌നാഥ് ബെഹ്‌റ. ഇതിനുള്ള നടപടികള്‍ പുരോഗമിച്ച് വരികയാണെന്നും അദ്ദേഹം പറഞ്ഞു.
ഇതേത്തുടര്‍ന്ന് ജിഷ്ണുവിന്റെ അമ്മ ഡി.ജി.പി ഓഫിസിന് മുന്നില്‍ ഇന്നുമുതല്‍ നടത്താനിരുന്ന അനിശ്ചിതകാല നിരാഹാര സമരം പിന്‍വലിച്ചു.
പ്രതികളെ ഉടന്‍ പിടികൂടുമെന്ന് ഡി.ജി.പി ഉറപ്പുനല്‍കിയതിനെ തുടര്‍ന്നാണ് സമരത്തില്‍ നിന്ന് പിന്മാറുന്നതെന്ന് ജിഷ്ണുവിന്റെ കുടുംബം വ്യക്തമാക്കി. മുഴുവന്‍ പ്രതികളെയും ഉടന്‍ പിടികൂടിയില്ലെങ്കില്‍ ഏപ്രില്‍ അഞ്ചുമുതല്‍ അനിശ്ചിതകാല നിരാഹാരം ആരംഭിക്കുമെന്നും അവര്‍ വ്യക്തമാക്കി.
ജിഷ്ണു പ്രണോയിയുടെ മരണവുമായി ബന്ധപ്പെട്ട കേസില്‍ നെഹ്‌റു ഗ്രൂപ്പ് മേധാവി പി. കൃഷണദാസാണ് ഒന്നാം പ്രതി. കോളജ് പി.ആര്‍.ഒ സഞ്ജിത് വിശ്വനാഥന്‍, വൈസ് പ്രിന്‍സിപ്പല്‍ ഡോ. എന്‍.കെ. ശക്തിവേല്‍, അധ്യാപകരായ സി.പി. പ്രവീണ്‍, ദിപിന്‍ എന്നിവരാണ് കേസിലെ മറ്റു പ്രതികള്‍. പ്രതികളില്‍ കൃഷ്ണദാസ് ഒഴികെയുള്ളവര്‍ ഒളിവില്‍പോയതിനാല്‍ അന്വേഷണ സംഘം ലുക്ക് ഔട്ട് നോട്ടിസ് ഇറക്കിയിട്ടുണ്ട്. മുഖ്യ പ്രതിയെന്ന് ആരോപിക്കപ്പെടുന്ന കൃഷ്ണദാസിന് ഹൈക്കോടതി മുന്‍കൂര്‍ ജാമ്യവും അനുവദിച്ചിട്ടുണ്ട്.