കാബൂള്‍: അഫ്ഗാനിസ്ഥാനിലെ കാബൂളില്‍ സൈനികവാഹനത്തിനു നേരെ നടന്ന ചാവേറാക്രമണത്തില്‍ 40 പൊലിസുകാര്‍ കൊല്ലപ്പെട്ടു. 100 ലേറെ പൊലിസുകാര്‍ക്ക് പരുക്കുണ്ട്. ആക്രമണത്തിന്റെ ഉത്തരവാദിത്വം താലിബാന്‍ ഏറ്റെടുത്തു.

മൂന്നു വാഹനങ്ങള്‍ക്ക് നേരെ രണ്ട് ചാവേറുകളാണ് അക്രമണം നടത്തിയതെന്ന് അഫ്ഗാനിലെ പൊലിസ് ഉദ്യോഗസ്ഥന്‍ അറിയിച്ചു. രണ്ട് വാഹനത്തിലുണ്ടായിരുന്ന മുഴുവന്‍ പൊലിസുകാരും ആക്രമണത്തില്‍ കൊല്ലപ്പെട്ടു. പരിശീലനം കഴിഞ്ഞ് പൊലിസ് ക്യാമ്പിലേക്ക് മടങ്ങുന്ന ട്രെയിനി പൊലിസ് ഉദ്യോഗസ്ഥരാണ് കൊല്ലപ്പെട്ടത്.

ഒരാഴ്ച്ച മുന്‍പ് കാബൂളില്‍ നേപ്പാളി സുരക്ഷാ ഉദ്യോഗസ്ഥര്‍ സഞ്ചരിച്ച ബസ്സിനു നേരെയുണ്ടായ ചാവേറാക്രമണത്തില്‍ പതിനാലു പേര്‍ മരിച്ചിരുന്നു. ഈ ആക്രമണത്തിന്റെ ഞെട്ടല്‍ മാറുന്നതിന് മുമ്പാണ് വീണ്ടും ആക്രമണം നടന്നത്.