തിരുവനന്തപുരം: റേഷന്‍ വിഹിതം വെട്ടിക്കുറച്ച കേന്ദ്ര തീരുമാനം പുന:പരിശോധിക്കണമെന്നാവശ്യപ്പെട്ട് റേഷന്‍ ഡീലേഴ്‌സ് അസോസിയേഷന്‍ പ്രധാനമന്ത്രിക്ക് നിവേദനം നല്‍കും.
അടുത്ത മാസംമുതല്‍ റേഷന്‍ പഞ്ചസാരയും, ആട്ടയും നിര്‍ത്തലാക്കിയതിന് പുറമേ അധിക വിഹിതം അരി നല്‍കില്ലെന്നുമാണ് കേന്ദ്രത്തിന്റെ നിലപാട്.
ഇത് കേരളത്തിന്റെ ഭക്ഷ്യ ഭദ്രതയെ തന്നെ ബാധിക്കുമെന്ന് അസോസിയേഷന്‍ ദേശീയ ജനറല്‍ സെക്രട്ടറി ബേബിച്ചന്‍ മുക്കാടന്‍ വാര്‍ത്താ സമ്മേളനത്തില്‍ പറഞ്ഞു.
വൈദ്യുതിയില്ലാത്ത വീടുകള്‍ക്കു മാത്രം നല്‍കിയ മണ്ണെണ്ണ മത്സ്യബന്ധന ബോട്ടുകള്‍ക്ക് സംസ്ഥാനം മറിച്ചു വിറ്റുവെന്ന കാരണം പറഞ്ഞാണ് കേന്ദ്ര വിഹിതം വെട്ടിക്കുറച്ചിരിക്കുന്നത്. റേഷന്‍ പഞ്ചസാര ഏപ്രില്‍ മുതല്‍ നിര്‍ത്തലാക്കി.
സംസ്ഥാനങ്ങള്‍ക്ക് ആവശ്യമെങ്കില്‍ സ്വന്തം ചെലവില്‍ പഞ്ചസാര വാങ്ങി സബ്‌സിഡി നിരക്കില്‍ വിതരണം ചെയ്യാം. ഇത് പ്രതിവര്‍ഷം 192 കോടിയുടെ ബാധ്യത സംസ്ഥാന സര്‍ക്കാരിന് ഉണ്ടാക്കുമെന്നും അദ്ദേഹം പറഞ്ഞു.
റേഷന്‍ വ്യാപാരികളുടെ മാസവേതനം പ്രഖ്യാപിക്കാത്തതില്‍ പ്രതിഷേധിച്ച് ഏപ്രില്‍ മുതല്‍ സ്റ്റോക്ക് എടുക്കാതെയും, മെയ് ഒന്നുമുതല്‍ റേഷന്‍ വിതരണം സ്തംഭിപ്പിച്ചും സമരം ആരംഭിക്കുമെന്നും അദ്ദേഹം പറഞ്ഞു.