മലപ്പുറം: കാസര്‍കോട് പഴയ ചൂരി ജുമാമസ്ജിദ് മുഅദ്ദിനും മദ്‌റസാധ്യാപകനുമായ റിയാസ് മുസ്്‌ലിയാരെ ക്രൂരമായി കൊലപ്പെടുത്തിയതിന് പിന്നിലെ ആര്‍.എസ്.എസ് നേതൃത്വത്തിന്റെ പങ്ക്കൂടി പുറത്തുകൊണ്ടുവരണമെന്ന് മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ് ആവശ്യപ്പെട്ടു.
കൊലപാതകത്തിന്റെ തൊട്ടു മുന്‍പ് മംഗലാപുരം എം.പി നളിന്‍കുമാര്‍ കട്ടീല്‍ അണികള്‍ക്ക് ആവേശം നല്‍കും വിധത്തില്‍ നടത്തിയ പ്രകോപനപരമായ പ്രസംഗം അന്വേഷണ ഉദ്യോഗസ്ഥര്‍ മുഖവിലക്കെടുക്കണം.
കൊലപാതകത്തിന് പിന്നില്‍ മറ്റു ഗൂഢലക്ഷ്യങ്ങളുണ്ടായിരുന്നില്ലെന്ന പൊലിസ്ഭാഷ്യം അവിശ്വസനീയമാണ്. പ്രതികളായ മൂന്നുപേരും ആര്‍.എസ്.എസ് ശാഖകളില്‍ പ്രവര്‍ത്തിച്ചതിന്റെ പൂര്‍ണതെളിവുകള്‍ പുറത്തുവന്നിട്ടും വധത്തിന് പിന്നിലെ ഗൂഢാലോചനയും ആര്‍.എസ്.എസ് നേതൃത്വത്തിന്റെ പങ്കും അന്വേഷണ വിധേയമാക്കാത്തതില്‍ ദുരൂഹതയുണ്ട്.
സമീപകാലത്ത് ആര്‍.എസ്.എസ് നടത്തിയ പല കൊലക്കേസുകളിലും പ്രതികള്‍ക്ക് രക്ഷപ്പെടാനുള്ള അനുകൂലമായ സാഹചര്യങ്ങള്‍ പൊലിസ് സ്വീകരിച്ചിട്ടുണ്ടെന്ന ആക്ഷേപവും ഇതിനകം ഉയര്‍ന്നു വന്നിട്ടുണ്ട്.
റിയാസ് മുസ്‌ലിയാര്‍ വധവും തിരൂരിലെ ആമപ്പാറ യാസിര്‍ വധം, കൊടിഞ്ഞിയിലെ ഫൈസല്‍ വധം എന്നിവയെല്ലാം നടത്തിയിട്ടുള്ളത് മുസ്‌ലിംഭൂരിപക്ഷ പ്രദേശങ്ങളിലാണ്.
തികഞ്ഞ സൗഹൃദാന്തരീക്ഷം നിലനില്‍ക്കുന്ന സംസ്ഥാനത്തെ മതസൗഹാര്‍ദം തകര്‍ത്ത് വര്‍ഗീയകലാപം സൃഷ്ടിക്കാനുള്ള ശ്രമമാണ് ഇതിന് പിന്നില്‍.
വര്‍ഗീയകലാപം സൃഷ്ടിക്കാനുള്ള ആര്‍.എസ്.എസിന്റെ ആസൂത്രിതമായ ശ്രമങ്ങളെക്കുറിച്ചും റിയാസ് മുസ്‌ലിയാരുടെ വധത്തിലെ ആര്‍.എസ്.എസ്, ബി.ജെ.പി പങ്കും അന്വേഷിച്ച് കുറ്റക്കാരായ മുഴുവന്‍ ആളുകളെയും നിയമത്തിന്റെ മുന്നില്‍കൊണ്ടുവരാന്‍ ഗവണ്‍മെന്റ് മുന്നോട്ടുവരണമെന്നും മജീദ് ആവശ്യപ്പെട്ടു.