പയ്യന്നൂര്‍: പയ്യന്നൂരിനടുത്ത് ഏച്ചിലാംവയലില്‍ പുലിയിറങ്ങിയതായി അഭ്യൂഹം. ഇതേതുടര്‍ന്ന് പ്രദേശവാസികള്‍ സ്ഥലത്ത് പരിശോധന നടത്തി. രണ്ടാം തവണയാണ് ഇവിടെ പുലിയെ കണ്ടുവെന്ന വാര്‍ത്ത പരക്കുന്നത്. രണ്ട് ദിവസം മുമ്പ് യാത്രക്കാരനായ ഒരാള്‍ റോഡരികില്‍ പുലിയെ കണ്ടതായി പറഞ്ഞിരുന്നു. തെരച്ചില്‍ നടത്തിയെങ്കിലും കണ്ടില്ല.
ഇന്നലെ രാവിലെ യാത്രക്കാരനായ മറ്റൊരാള്‍ പുലി റോഡ് മുറിച്ച് കടന്നു പോകുന്നതായി അറിയിക്കുകയായിരുന്നു. തുടര്‍ന്നാണ് പ്രദേശത്ത് നാട്ടുകാര്‍ പരിശോധന നടത്തിയത്. വിലിയ കുന്നും കുറ്റിക്കാടുകളും നിറഞ്ഞ ഏച്ചിലാംവയല്‍ കുന്നില്‍ പുലിയെ എളുപ്പത്തില്‍ കണ്ടെത്താന്‍ ബുദ്ധിമുട്ടാണ്. പയ്യന്നൂര്‍ പൊലിസില്‍ വിവരം നല്‍കിയതിന്റെ അടിസ്ഥാനത്തില്‍ അടുത്ത ദിവസം വനംവകുപ്പ് സ്ഥലത്ത് എത്തിച്ചേരുമെന്നാണ് സൂചന.