തിരുവനന്തപുരം: ഗ്രാമീണ ഡാക് സേവകരുടെ സേവനവേതന വ്യവസ്ഥകള്‍ പരിഷ്‌കരിക്കണമെന്നാവശ്യപ്പെട്ടു രാജ്യത്തെ തപാല്‍ ജീവനക്കാര്‍ നടത്തുന്ന സമരം പത്താം ദിനത്തിലേക്ക്. സ്‌കൂള്‍, കോളജുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ തുറക്കാന്‍ ദിവസങ്ങള്‍ മാത്രം ബാക്കി നില്‍ക്കെ തപാല്‍ ഓഫിസുകള്‍ പ്രവര്‍ത്തിക്കാത്തതിനാല്‍ ജനങ്ങള്‍ ദുരിതത്തിലായി. തപാല്‍ സമരം ഒത്തുതീര്‍ക്കാന്‍ ഇടപെടാത്ത കേന്ദ്രനടപടിക്കെതിരേ പ്രതിഷേധം വ്യാപകമായി.
സമരത്തെത്തുടര്‍ന്ന് സ്‌കൂള്‍, കോളജ് അഡ്മിഷന്‍ ടിക്കറ്റുകള്‍, വിവിധ പെന്‍ഷനുകള്‍, പാസ്‌പോര്‍ട്ടുകള്‍ തുടങ്ങി സുപ്രധാന തപാല്‍ ഉരുപ്പടികള്‍ കെട്ടിക്കിടക്കുകയാണ്. സര്‍ക്കാരിന്റെ വിവിധ ഉത്തരവുകളും സര്‍വകലാശാലകളുടെ സര്‍ട്ടിഫിക്കറ്റുകളും മെമ്മോകളും പാതിവഴിയില്‍ കുടുങ്ങിക്കിടക്കുകയാണ്.
ഇതിനുപുറമെ തപാല്‍ ഓഫിസ് വഴിയുള്ള സാമ്പത്തിക ഇടപാടുകളും മുടങ്ങി. ഓണ്‍ലൈന്‍ വ്യാപാരം നടത്തുന്ന കമ്പനികള്‍ ഉപയോക്താക്കള്‍ക്ക് അയക്കുന്ന കേക്കുകള്‍ ഉള്‍പ്പെടെയുള്ള ഭക്ഷ്യസാധനങ്ങളും വസ്ത്രങ്ങളും തപാല്‍ ബാഗുകളില്‍ കെട്ടിക്കിടക്കുന്നുണ്ട്. പ്രസിദ്ധീകരണങ്ങളുടെ വിതരണവും പ്രതിസന്ധിയിലായി. സര്‍വിസ്, പെന്‍ഷന്‍ സംഘടനകള്‍ ഉള്‍പ്പെടെയുള്ളവര്‍ തപാല്‍ വഴി മാത്രമാണു വരിക്കാര്‍ക്കു പ്രസിദ്ധീകരണങ്ങള്‍ എത്തിക്കുന്നത്. ഇതും നാളുകളായി മുടങ്ങിക്കിടക്കുകയാണ്.
ഇതിനകം നിരവധി തവണ ചര്‍ച്ച നടന്നിട്ടും പ്രശ്‌നപരിഹാരമായില്ല. രാജ്യത്താകെ ഈ സ്ഥിതി ഉണ്ടായിട്ടും കേന്ദ്രസര്‍ക്കാര്‍ വിഷയത്തില്‍ ഗൗരവമായി ഇടപെടുന്നില്ല. പ്രശ്‌നത്തില്‍ ബി.ജെ.പി നേതൃത്വം ഇടപെടാത്തതിനെതിരേ കടുത്ത വിമര്‍ശനം ഉയര്‍ന്നിട്ടുണ്ട്. സമരത്തെത്തുടര്‍ന്നു കേരളത്തില്‍ മാത്രം 1.40 കോടി തപാല്‍ ഉരുപ്പടികളാണു കെട്ടിക്കിടക്കുന്നത്. സംസ്ഥാനത്ത് 550 തപാല്‍ ഓഫിസുകളുണ്ട്. ഓരോ ഓഫിസും പ്രതിദിനം ശരാശരി 500 തപാല്‍ ഉരുപ്പടികള്‍ കൈമാറുന്നുവെന്നാണു കണക്ക്.