ഏറ്റുമാനൂര്‍: വനിതാകമ്മിഷന്‍ അധ്യക്ഷ എം.സി ജോസഫൈന് കാറപകടത്തില്‍ പരുക്ക്. കൊല്ലപ്പെട്ട കെവിന്‍ പി. ജോസഫിന്റെ നട്ടാശ്ശേരിയിലെ വീട്ടിലേക്കുള്ള യാത്രാമധ്യേ ഏറ്റുമാനൂര്‍ പട്ടിത്താനത്തായിരുന്നു അപകടം. മതിലിലിടിച്ച് കാര്‍ കീഴ്‌മേല്‍ മറിയുകയായിരുന്നു. പരുക്കേറ്റ ജോസഫൈനെ തെള്ളകത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ഡ്രൈവര്‍ ബോബി പരുക്കുകളില്ലാതെ അത്ഭുതകരമായി രക്ഷപ്പെട്ടു.
ഇന്നലെ വൈകിട്ട് 3.45 ഓടെ എം.സി റോഡില്‍ പട്ടിത്താനം ചുമടുതാങ്ങി ബസ് സ്റ്റോപ്പിനു സമീപം ആയിരുന്നു അപകടം. കമ്മിഷന്‍ അധ്യക്ഷയുടെ കാര്‍ മൂവാറ്റുപുഴ ഭാഗത്തുനിന്ന് വരികയായിരുന്നു. ബസ് സ്റ്റോപ്പിനു ശേഷം പെട്ടെന്ന് വലത്തേക്ക് വെട്ടിത്തിരിഞ്ഞ കാര്‍ വലതുവശത്ത് പ്ലാപ്പള്ളില്‍ അനില്‍സദനത്തില്‍ സുനില്‍കുമാറിന്റെ വീടിന്റെ ചുറ്റുമതില്‍ ഇടിച്ചുതകര്‍ത്ത് കീഴ്‌മേല്‍ മറിയുകയായിരുന്നു. ഈ സമയം റോഡില്‍ മറ്റ് വാഹനങ്ങളില്ലാതിരുന്നതിനാല്‍ ദുരന്തം ഒഴിവായി.