എറണാകുളം: കൊവിഡ്-19 ബാധിച്ച് മരിച്ചയാളുടെ സംസ്‌കാര ചടങ്ങുകള്‍ വളരെ സുരക്ഷിതമായി നടത്തുമെന്ന് ആരോഗ്യ മന്ത്രി കെ.കെ ശൈലജ. കൊവിഡ്-19 പ്രോട്ടോക്കോള്‍ പാലിച്ചായിരിക്കും സംസ്‌കാരചടങ്ങുകള്‍ നടത്തുക.

രക്ഷപ്പെടുത്താന്‍ പരമാവധി ശ്രമിച്ചിട്ടുണ്ട് അദ്ദേഹത്തിന് മറ്റ് അസുഖങ്ങളുമുണ്ടായതാണ് സ്ഥിതി ഗുരുതരമാവാന്‍ കാരണമായതെന്ന് മന്ത്രി പറഞ്ഞു.മൃതദേഹം ബന്ധുക്കളെ വീഡിയോ വഴി കാണിച്ചിട്ടുണ്ട്. അതേ സമയം മൃതദേഹം ബന്ധുക്കള്‍ക്ക് വിട്ട് നല്‍കില്ലെന്ന് മന്ത്രി കുട്ടിചേര്‍ത്തു. 

ആരോഗ്യവകുപ്പ് അധികൃതരുടേയും ജില്ലാ ഭരണകുടത്തിന്റേയും കര്‍ശന നിരീക്ഷണവും ജാഗ്രതയും സംസ്‌കാര ചടങ്ങിന് ഉറപ്പ് വരുത്തിയിട്ടുണ്ട്. മൃതദേഹത്തില്‍ നിന്നും ഏതെങ്കിലും തരത്തിലുള്ള രോഗവ്യാപന സാധ്യയുണ്ടോ എന്ന് പരിശോധിച്ചതായി അധികൃതര്‍ വ്യക്തമാക്കി.

നാലുപേര്‍ മാത്രമാണ് സംസ്‌കാരചടങ്ങില്‍ പങ്കെടുക്കുക. ബന്ധുക്കളെ മൃതദേഹം സ്പര്‍ശിക്കാന്‍ അനുവദിക്കില്ല. സംസ്‌കാര ചടങ്ങിന് പങ്കെടുക്കുന്നവരും മൃതദേഹം കൊണ്ടുപോകാന്‍ ഉപയോഗിച്ച വാഹനത്തിലെ ഡ്രൈവറും നിരീക്ഷണത്തില്‍ കഴിയാന്‍ നിര്‍ദേശിച്ചിട്ടുണ്ട്.

കഴിഞ്ഞ മാര്‍ച്ച് 22 നാണ് മരിച്ച വ്യക്തിയെ ആശുപത്രി ഐസൊലേഷനില്‍ പ്രവേശിപ്പിച്ചത്. ഗള്‍ഫില്‍ നിന്നും വരുമ്പോള്‍ ഇ്ദദേഹത്തിന് ഉയര്‍ന്ന രക്തസമ്മര്‍ദ്ദവും ന്യുമോണിയയുമുണ്ടായിരുന്നു. കൊവിഡ് ബാധിച്ചതോടെ ആരോഗ്യനില വഷളാകുകയായിരുന്നു. ഇദ്ദേഹവുമായി ഇടപഴകിയ എല്ലാവരേയും നിരീക്ഷണത്തിലാക്കിയിട്ടുണ്ട്. കുടാതെ യാത്രചെയ്ത വിമാനത്തിലുള്ളവരും നിരീക്ഷണത്തിലാണ്.