ചാരുംമൂട്: നൂറനാട് ജങ്ഷനില്‍ നിര്‍ത്തിയിട്ടിരുന്ന ടൂറിസ്റ്റ് ബസുകളിലെ മ്യൂസിക് സൗണ്ട് സിസ്റ്റം അപഹരിക്കാന്‍ എത്തിയ മൂന്നു പേരെ നാട്ടുകാരുടെ സഹായത്തോടെ പൊലിസ് പിടികൂടി.
നൂറനാട് എരുമക്കുഴി ആലൂത്തറ വടക്കേതില്‍ ശരത് (22), നൂറനാട് പള്ളിക്കല്‍ മേലൂട് പതിനാലാം മൈല്‍ അനീഷ് ഭവനത്തില്‍ അനീഷ് (25), പാലമേല്‍ പയ്യനല്ലൂര്‍ പുതുശ്ശേരി അയ്യത്തു വീട്ടില്‍ അനന്തു (21) എന്നിവരാണ് അറസ്റ്റിലായത്.
തിങ്കള്‍ വെളുപ്പിന് ഒന്നരക്ക് വാഗണര്‍, ആപ്പ പൊട്ടിഓട്ടോ സഹിതം മോഷണത്തിനു വേണ്ടി എത്തിയ സംഘത്തിലെ രണ്ടു പേര്‍ ഗ്യാരേജില്‍ കിടന്ന ടൂറിസ്റ്റ് ബസിന്റെ മുകളില്‍ കയറി എയര്‍ഹോള്‍വഴി അകത്തു കടക്കാന്‍ ശ്രമിക്കുന്നതിനിടയില്‍ ബസില്‍ ഉണ്ടായിരുന്ന ജീവനക്കാര്‍ ഇവരെ പിടികൂടുകയായിരുന്നു.
ഇവര്‍ പിടിക്കപ്പെട്ടതിനെത്തുടര്‍ന്ന് വാഹനത്തില്‍ വന്ന കൂട്ടാളികള്‍ വാഹനത്തില്‍ രക്ഷപ്പെട്ടു.
കെ.പി റോഡുവഴി യാത്ര ചെയ്ത ചിലരാണ് അസമയത്ത് ബസിനു മുന്നില്‍ വാഗനറും പൊട്ടി ഓട്ടോയും കിടക്കുന്ന വിവരം പോലീസിനെ അറിയിച്ചത്.
നൂറനാട് മേഖലയില്‍ ഏതാണ്ട് അമ്പതിലധികം ടൂറിസ്റ്റ് ബസുകളാണുള്ളത്.
ഇതിലെല്ലാം ലക്ഷങ്ങള്‍ വിലമതിക്കുന്ന സൗണ്ട് സിസ്റ്റമാണു ഘടിപ്പിച്ചുള്ളത്.
മൂന്നു മാസം മുമ്പ് മുതുകാട്ടുകര പെട്രോള്‍ പമ്പില്‍ നിര്‍ത്തിയിട്ടിരുന്ന ബസില്‍ നിന്നും ലക്ഷങ്ങള്‍ വിലമതിക്കുന്ന ഉപകരണങ്ങള്‍ മോഷണം പോയിരുന്നു.ഇതിന്റെ അന്വേഷണം നടക്കുന്നതിനിടയിലാണ് പുതിയ സംഭവം.
ഇവരെ ചോദ്യം ചെയ്തതില്‍ മോഷണം നടന്ന സംഭവത്തില്‍ ഇവര്‍ക്ക് പങ്ക് ഉള്ളതായി തെളിവില്ല.
ഇവരുടെ അറസ്റ്റ് രേഖപ്പെടുത്തിയതിനെത്തുടര്‍ന്ന് പ്രതികളെ മാവേലിക്കര കോടതിയില്‍ ഹാജരാക്കി. രക്ഷപ്പെട്ട പ്രതികള്‍ക്കു വേണ്ടി അന്വേഷണം തുടങ്ങിയായി പൊലിസ് അറിയിച്ചു.