തിരുവനന്തപുരം: മിടുക്കന്‍മാരും മിടുക്കികളുമായി അക്ഷരമുറ്റത്ത് എത്തിയത് ലക്ഷങ്ങള്‍.
പുത്തനുടുപ്പും കുടയും ബാഗുമായി മൂന്നരലക്ഷം കുരുന്നുകളാണ് ഇത്തവണ ഒന്നാം ക്ലാസിലെത്തിയതെന്നാണ് അനൗദ്യോഗിക കണക്ക്. ഔദ്യോഗിക കണക്കെടുപ്പ് ആറാം പ്രവൃത്തിദിനത്തിലായിരിക്കും നടക്കുക. മധുരവും, വര്‍ണപൂക്കളും, തൊപ്പിയുമായി കുരുന്നുകളെ അക്ഷര ലോകത്തേക്ക് സ്വാഗതം ചെയ്യാന്‍ എല്ലാ സര്‍ക്കാര്‍, എയ്ഡഡ് സ്‌കൂളുകളിലും അധ്യാപകരും ജനപ്രതിനിധികളും സജ്ജമായിരുന്നു.
പൊതുവിദ്യാഭ്യാസ സംരക്ഷണയജ്ഞത്തിന് തുടക്കം കുറിച്ചതിനുശേഷമുള്ള രണ്ടാമത്തെ പ്രവേശനോത്സവമാണ് ഇന്നലെ നടന്നത്. ഒന്നു മുതല്‍ പത്തുവരെ ക്ലാസുകളിലായി 30 ലക്ഷത്തോളം വിദ്യാര്‍ഥികളാണ് ഇന്നലെ സ്‌കൂളുകളില്‍ എത്തിയത്.