ന്യൂഡല്‍ഹി: ഒരു കുടുംബത്തിലെ ഏഴുപേരെ തീകൊളുത്തിക്കൊന്ന കേസില്‍ വധശിക്ഷ ലഭിച്ചയാളുടെ ദയാഹരജി രാഷ്ട്രപതി രാംനാഥ് കോവിന്ദ് തള്ളി.
രാഷ്ട്രപതിയായി ചുമതലയേറ്റതിനുശേഷം രാംനാഥ് കോവിന്ദ് പരിഗണിക്കുന്ന ആദ്യത്തെ ദയാഹരജിയാണിത്. ബിഹാറിലെ ജഗത് റായി എന്നയാളുടെ ഹരജിയാണ് തള്ളിയത്. ബിഹാറിലെ വൈശാലി ജില്ലയില്‍ നിന്നുള്ള വിജേന്ദ്ര മെഹ്‌തോവിനെയും അദ്ദേഹത്തിന്റെ കുടുംബത്തിലെ ആറുപേരെയുമാണ് 2006ല്‍ ജഗത് റായി തീകൊളുത്തി കൊലപ്പെടുത്തിയത്. കൊല്ലപ്പെട്ടവരില്‍ അഞ്ചുപേര്‍ കുട്ടികളാണ്.
2005ല്‍ കാലി മോഷണവുമായി ബന്ധപ്പെട്ട് ജഗത് റായി, വസീര്‍ റായി, അജയ് റായി എന്നിവര്‍ക്കെതിരേ മെഹ്‌തോവ് പൊലിസില്‍ പരാതി നല്‍കിയിരുന്നു. കേസ് പിന്‍വലിക്കാനായി ജഗത് റായി ഉള്‍പ്പെടെയുള്ളവര്‍ സമ്മര്‍ദം ചെലുത്തിയെങ്കിലും ഇതിന് തയാറാവാത്തതിനെ തുടര്‍ന്നാണ് മെഹ്‌തോവിനെയും കുടുംബത്തെയും തീകൊളുത്തി കൊന്നത്.