വാഷിങ്ടണ്‍: അമേരിക്കയിലെ വിവാദമായ എണ്ണ പൈപ്പ്‌ലൈന്‍ പദ്ധതിക്കായി ഇന്ത്യയിലും ഇറ്റലിയില്‍ നിന്നും ഇറക്കുമതി ചെയ്യുന്ന സ്റ്റീല്‍ ഉപയോഗിക്കരുതെന്ന് ഡെമോക്രാറ്റിക് സെനറ്റര്‍മാര്‍. പ്രസിഡന്റ് ട്രംപിനോടാണ് അവരുടെ ആവശ്യം. സ്വദേശിവല്‍കരണമാണ് ഇവര്‍ കാരണമായി ചൂണ്ടിക്കാട്ടുന്നത്. കീസ്‌റ്റോണ്‍ എക്‌സ്.എല്‍ പൈപ്പ്‌ലൈന്‍ പദ്ധതി നടത്തിപ്പ് കനേഡിയന്‍ കമ്പനിക്കാണ്. 8000 ദശലക്ഷം ഡോളറിന്റെ പദ്ധതിയാണിത്. ഹരിതഗേഹ വാതക പ്രഭാവം ഉണ്ടാകുമെന്ന് ചൂണ്ടിക്കാട്ടി മുന്‍ പ്രസിഡന്റ് ബരാക് ഒബാമ കീസ്‌റ്റോണ്‍ പദ്ധതിക്ക് നേരത്തെ അനുമതി നിഷേധിച്ചിരുന്നു.
അമേരിക്കയില്‍ നിര്‍മിച്ച സ്റ്റീല്‍ തന്നെ ഉപയോഗിക്കണമെന്നാണ് സെനറ്റര്‍മാരായ ക്രിസ് വാന്‍ ഹോളന്‍, ടാമി ഡക്‌വര്‍ത്ത് എന്നിവരുടെ നേതൃത്വത്തിലുള്ള സെനറ്റര്‍മാര്‍ ട്രംപിനോട് ആവശ്യപ്പെട്ടിരിക്കുന്നത്. അമേരിക്കയില്‍ നടപ്പാക്കി വരുന്നതും ഇനി നടപ്പാക്കാന്‍ ഉദ്ദേശിക്കുന്നതും അറ്റകുറ്റപ്പണി നടത്തുന്നതുമായ പൈപ്പ്‌ലൈന്‍ പദ്ധതികള്‍ക്ക് തദ്ദേശീയമായി വികസിപ്പിക്കുന്ന ഉല്‍പന്നങ്ങള്‍ ഉപയോഗിക്കാന്‍ ട്രംപ് നേരത്തെ ഉത്തരവിറക്കിയിരുന്നു. എന്നാല്‍, ഇതില്‍ നിന്ന് കീസ്‌റ്റോണിനെ ഒഴിവാക്കിയിരുന്നു.