പെരിന്തല്‍മണ്ണ: പാറല്‍ വീട്ടിക്കാട് എ.എം.എല്‍.പി സ്‌കൂള്‍ 118-ാം വാര്‍ഷികാഘോഷത്തിന് ഇന്ന് സമാപനം. 32 വര്‍ഷത്തെ സേവനത്തിന് ശേഷം വിരമിക്കുന്ന പി.കെ ഉഷാദേവി ടീച്ചര്‍ക്കുള്ള യാത്രയയപ്പും ഇതോടൊന്നിച്ച് നടക്കും. രാവിലെ പത്തിന് ആരംഭിക്കുന്ന പരിപാടിയില്‍ മുതിര്‍ന്ന പൂര്‍വ വിദ്യാര്‍ഥികളെ ആദരിക്കല്‍, ഉപഹാര സമര്‍പ്പണം, ഓര്‍മകള്‍ പങ്കുവയ്ക്കല്‍, മികവു പുലര്‍ത്തിയ പൂര്‍വ വിദ്യാര്‍ഥികളെ അനുമോദിക്കല്‍ തുടങ്ങിയവ നടക്കും. വൈകിട്ട് മൂന്നിന് സാംസ്‌കാരിക ഘോഷയാത്ര നടക്കും. നാലിന് യാത്രയയപ്പ് സമ്മേളനം നിയമസഭാ സ്പീക്കര്‍ പി.ശ്രീരാമകൃഷ്ണന്‍ ഉദ്ഘാടനം ചെയ്യും. മഞ്ഞളാംകുഴി അലി എം.എല്‍.എ അധ്യക്ഷനാകും.