തിരുവനന്തപുരം: ലോക്ക്ഡൗണ്‍ കാലത്തെ ആശ്വാസനടപടിയായി സര്‍ക്കാര്‍ പ്രഖ്യാപിച്ച ഭക്ഷ്യവിഭവ കിറ്റുകള്‍ വിതരണത്തിനൊരുങ്ങുന്നു. അന്ത്യോദയ, അന്നയോജന വിഭാഗത്തിനുള്ള കിറ്റുകളുടെ പായ്ക്കിങ് പുരോഗമിക്കുകയാണ്. മറ്റു വിഭാഗങ്ങള്‍ക്കുള്ള വിഭവങ്ങളുടെ സംഭരണം തുടങ്ങിയിട്ടുണ്ട്.
സംസ്ഥാനത്ത് റേഷന്‍ കാര്‍ഡുള്ളവര്‍ക്കും ഇല്ലാത്തവര്‍ക്കുമായി 17 വിഭവങ്ങള്‍ അടങ്ങിയ കിറ്റാണ് വിതരണം ചെയ്യാന്‍ തീരുമാനിച്ചിരിക്കുന്നത്. 87 ലക്ഷം കിറ്റുകളാണ് തയാറാക്കുന്നത്. ഇതുസംബന്ധിച്ച് സപ്ലൈകോ ഉദ്യോഗസ്ഥര്‍ക്കുള്ള നിര്‍ദേശങ്ങള്‍ കഴിഞ്ഞദിവസം പുറത്തിറക്കിയിരുന്നു.
സപ്ലൈകോ സി.എം.ഡിയുടെ മേല്‍നോട്ടത്തിലാണ് സാധനങ്ങള്‍ ശേഖരിച്ച് സപ്ലൈകോയുടെ 56 ഡിപ്പോകളിലും എത്തിക്കുന്നത്.
സ്ഥലപരിമിതിയുള്ള ഡിപ്പോകളുടെ പരിസരത്തുള്ള ഹാളുകളും മറ്റും സംഭരണത്തിനായി പ്രയോജനപ്പെടുത്തുന്നുണ്ട്. സംഭരണത്തിന്റെയും സാധനങ്ങള്‍ പായ്ക്കിങ്ങിനായി മാറ്റുന്നതിന്റെയും ചുമതല ഡിപ്പോ മാനേജര്‍മാര്‍ക്കാണ്. താലൂക്ക് സപ്ലൈ ഓഫിസര്‍മാര്‍ ഇതിനു മേല്‍നോട്ടം വഹിക്കും.