ഗുഡ്ഗാവ്: ജാപ്പനീസ് കമ്പനി മിസ്തുബിഷിയുടെ എച്ച്.ആര്‍ മാനേജര്‍ക്ക് നേരെ വധശ്രമം. കമ്പനിയുടെ മനേസറിലെ ഓഫിസിലാണ് സംഭവം. കഴിഞ്ഞ ദിവസം രാവിലെ ഒമ്പത് മണിയോടെ എച്ച്.ആര്‍ തലവന്‍ ബിനീഷ് ശര്‍മയ്ക്ക് വെടിയേല്‍ക്കുകയായിരുന്നു.
സംഭവത്തില്‍ കമ്പനി ജീവനക്കാരനായ ജോഗീന്ദറിനെ പൊലിസ് അറസ്റ്റ് ചെയ്തു.വീട്ടില്‍ നിന്ന് ഓഫിസിലേക്ക് വരും വഴിയായിരുന്നു ബിനീഷിന് നേരെയുള്ള ആക്രമണം. ബൈക്കിലെത്തിയ അക്രമി ബിനീഷിന്റെ വാഹനം തടഞ്ഞു നിര്‍ത്തി വെടിയുതിര്‍ക്കുകയായിരുന്നു. അക്രമം നടത്തി രക്ഷപ്പെടാന്‍ ശ്രമിക്കുന്നതിനിടെയാണ് ജോഗീന്ദറിനെ പിടികൂടിയത്.മറ്റൊരു ജീവനക്കാരനോട് മോശമായി പെരുമാറിയതിനെ തുടര്‍ന്ന് ബുധനാഴ്ച ബിനേഷ് ജോഗീന്ദറിനെ ശകാരിച്ചിരുന്നു.ഇതിലുള്ള വിരോധമാണ് കൊലപാതക ശ്രമത്തിന് കാരണമെന്ന് ജോഗീന്ദര്‍ പൊലിസിനോട് പറഞ്ഞു.ആശുപത്രിയില്‍ പ്രവേശിപ്പിച്ച ബിനീഷ് അപകടനില തരണം ചെയ്തതായി ഡോക്ടര്‍മാര്‍ അറിയിച്ചു.