റോം: കൊറോണയെന്ന കാലവിപത്തിനെ നേരിടാന്‍ ലോകം ഒന്നിക്കണമെന്ന് പോപ്പ് ഫ്രാന്‍സിസ്. ഈസ്റ്റര്‍ സന്ദേശത്തിലാണ് ലോകത്തോട് പോപ്പിന്റെ ആഹ്വാനം. ഇപ്പോള്‍ സ്വന്തത്തിലേക്ക് ചുരുങ്ങാനുള്ള സമയമല്ല. ഈ വെല്ലുവിളിയെ എല്ലാവരും നേരിടുകയാണ്. തൊഴിലാളികള്‍ക്ക് പ്രതീക്ഷയും അവസരങ്ങളും ഒരുക്കാന്‍ രാഷ്ട്ര നേതാക്കളോട് അദ്ദേഹം ആഹ്വാനം ചെയ്തു. അതോടൊപ്പം ലോകത്ത്   ജനങ്ങള്‍ക്ക് ആശ്വാസവും കടങ്ങളില്‍ ഇളവുകള്‍ നല്‍കാനും ശ്രമിക്കണം. സംഘര്‍ഷങ്ങളെല്ലാം അവസാനിപ്പിച്ച് സമാധാനത്തില്‍ കഴിയാനും അദ്ദേഹം ലോകത്തെ ആഹ്വാനം ചെയ്തു. യൂറോപ്യന്‍ യൂനിയന്‍ വലിയ പ്രതിസന്ധിയെയാണ് നേരിടുന്നത്. അത് അവരുടെ മാത്രല്ല ലോകത്തിന്റെ കൂടി ഭാവിയെയാണ് പ്രയാസത്തിലാക്കുക. കൊവിഡിനെതിരേ പോരാടുന്ന ഡോക്ടര്‍മാരെയും നഴ്‌സുമാരെയും ആരോഗ്യപ്രവര്‍ത്തകരെയും പോപ്പ് അഭിനന്ദിച്ചു. കഴിഞ്ഞ വര്‍ഷം എഴുപതിനായിരത്തോളം പേര്‍ ഒത്തുകൂടി ഈസ്റ്റര്‍ ആഘോഷങ്ങള്‍ നടത്തിയ സെന്റ് പീറ്റേഴ്‌സ് സ്‌ക്വയര്‍ ഇന്നലെ ശൂന്യമായിരുന്നു. സെന്റ് പീറ്റേഴ്‌സ് പള്ളിക്കുള്ളിലാണ് എല്ലാ ഈസ്റ്ററിന്റെ ചടങ്ങുകളും സന്ദേശവും പോപ്പ് ഫ്രാന്‍സിസ്  നല്‍കിയത്. വിരലിലെണ്ണാവുന്നവര്‍മാത്രായിരുന്നു ഇവിടെ  സന്നിഹിതരായിരുന്നത്. എന്നാല്‍ ലോകത്തിന്റെ വിവിധ ഭാഗങ്ങളില്‍ നിന്നും ക്രിസ്തുമത വിശ്വാസികള്‍ ഇത് തത്സയം കാണാനുള്ള സൗകര്യം ഏര്‍പ്പെടുത്തിയിരുന്നു. ലോകത്തെ 1.3 ബില്യണ്‍ വരുന്ന കത്തോലിക്കാ സമൂഹം ദുഃഖവും ഭക്തിയും നിറഞ്ഞ മനസുമായാണ്  83 കാരനായ പോപ്പിന്റെ വാക്കുകള്‍ക്ക് ചെവിയോര്‍ത്തത്.