കൊച്ചി: ആകാംക്ഷകള്‍ക്ക് വിരാമം. ഇന്ത്യയുടെ ശക്തനായ പ്രതിരോധ താരം മലയാളിയായ അനസ് എടത്തൊടിക കേരള ബ്ലാസ്റ്റേഴ്‌സില്‍. ജംഷഡ്പൂര്‍ എഫ്.സിയില്‍ നിന്ന് അനസിനെ സ്വന്തം പാളയത്തിലെത്തിച്ചതായി ബ്ലാസ്റ്റേഴ്‌സ് ഔദ്യോഗികമായി സ്ഥിരീകരിച്ചു. രണ്ട് വര്‍ഷത്തെ കരാറിലാണ് അനസ് ബ്ലാസ്റ്റേഴ്‌സിനൊപ്പം ചേരുന്നത്. കഴിഞ്ഞ സീസണില്‍ അനസിനെ ടീമിലെത്തിക്കാന്‍ ബ്ലാസ്റ്റേഴ്‌സ് ശ്രമിച്ചിരുന്നെങ്കിലും ജംഷഡ്പൂര്‍ താരത്തെ സ്വന്തമാക്കുകയായിരുന്നു. പരുക്കിനെ തുടര്‍ന്ന് കഴിഞ്ഞ ഐ.എസ്.എല്‍ സീസണില്‍ അനസിന് എട്ട് മത്സരങ്ങളില്‍ മാത്രമാണ് കളിക്കാന്‍ കഴിഞ്ഞത്.
അനസ് കൂടി ടീമിലെത്തിയതോടെ കരുത്തുറ്റ പ്രതിരോധ നിര കേരള ടീമിന് സ്വന്തമായി. ഇന്ത്യന്‍ ഫുട്‌ബോള്‍ ടീമിന്റെ നെടുംതൂണുകളായി പ്രതിരോധം കാക്കുന്ന അനസ്- സന്ദേശ് ജിങ്കന്‍ കൂട്ട് അടുത്ത ഐ.എസ്.എല്‍ സീസണില്‍ ബ്ലാസ്റ്റേഴ്‌സിന് സ്വന്തം.