ശ്രീനഗര്‍: കശ്മിരില്‍ തീവ്രവാദി ആക്രമണത്തില്‍ റിട്ട. ജവാന്‍ കൊല്ലപ്പെട്ടു. ഇന്നലെ തെക്കന്‍ കശ്മിരിലെ കുല്‍ഗാം ജില്ലയിലെ രെദ്‌വാനിയിലാണ് ആയുധധാരികളുടെ ആക്രമണമുണ്ടായത്. അബ്ദുല്‍ ഹമീദ് മന്‍ദൂ എന്ന മുന്‍ സൈനികന്റെ വീടിനു നേരെയാണ് വെടിവയ്പുണ്ടായതെന്ന് യു.എന്‍.ഐ റിപ്പോര്‍ട്ട് ചെയ്തു. ഉടന്‍ ആശുപത്രിയിലെത്തിച്ചെങ്കിലും രക്ഷിക്കാനായില്ല. കുല്‍ഗാമില്‍ അടുത്തിടെ സി.ആര്‍.പി.എഫും സൈന്യവും തീവ്രവാദികളുമായി ഏറ്റുമുട്ടിയിരുന്നു.
മറ്റൊരു സംഭവത്തില്‍ കിഷ്ത്വാര്‍ ജില്ലയിലെ ഡക്കാനില്‍ തീവ്രവാദി ആക്രമണത്തില്‍ ഒരു സ്‌പെഷല്‍ പൊലിസ് ഓഫിസര്‍ കൊല്ലപ്പെടുകയും മറ്റൊരാള്‍ക്ക് പരുക്കേല്‍ക്കുകയും ചെയ്തു.