ആലുവ: വിദേശത്തുനിന്നും കുടംബത്തോടൊപ്പം പെരുന്നാള്‍ ആഘോഷിക്കാനെത്തിയ എടത്തല കുഞ്ചാട്ടുകര സ്വദേശി ഉസ്മാന്റെ പെരുന്നാള്‍ കോടതി കനിഞ്ഞില്ലെങ്കില്‍ ഇക്കുറി ഇരുമ്പഴിക്കുള്ളിലാവും. പൊലിസുകാരെ മര്‍ദിച്ചെന്ന കുറ്റം ചാര്‍ത്തി അറസ്റ്റ് ചെയ്ത് ആശുപത്രിയില്‍ പ്രവേശിപ്പിച്ചിരിക്കുന്ന ഉസ്മാനെ 22 വരെ റിമാന്‍ഡ് ചെയ്തതതോടെയാണ് ഈ യുവാവിന്റെ ഇത്തവണത്തെ പെരുന്നാള്‍ ഇരുമ്പഴിക്കുള്ളിലാവുമോ എന്ന ആശങ്കയുയരുന്നത്.
അലുവ രാജഗിരി ആശുപത്രിയില്‍ ഇന്നലെ വൈകിട്ട് 3.15 ഓടെ ജുഡിഷ്യല്‍ ഒന്നാം ക്ലാസ് മജിസ്‌ട്രേറ്റ് റിനോ ആണ് ശസ്ത്രക്രിയക്ക് ശേഷം വിശ്രമത്തിലായ ഉസ്മാനെ റിമാന്‍ഡ് ചെയ്തത്. ആരോഗ്യനില വീണ്ടെടുക്കാത്തതിനാല്‍ പ്രതിയെ സുഖപ്പെടുന്നത് വരെ ആശുപത്രിയില്‍ തന്നെ കഴിയാന്‍ അനുവദിക്കുമത്രേ. എന്നാല്‍ പരമാവധി മൂന്നോ നാലാ ദിവസങ്ങള്‍ക്കുള്ളില്‍ ആശുപത്രിയില്‍ നിന്ന് ഡിസ്ചാര്‍ജ് ചെയ്യും. അതോടെ ഉസ്മാനെ ആലുവ സബ് ജയിലിലേക്ക് മാറ്റേണ്ടി വരും. അടുത്ത വെള്ളിയോ ശനിയോ കേരളത്തില്‍ ചെറിയ പെരുന്നാള്‍ ആഘോഷിക്കുമ്പോള്‍ പറക്കമുറ്റാത്ത മൂന്നു കുട്ടികളും, ഭാര്യയും ഉമ്മയും വാപ്പയും ഉസ്മാനില്ലാത്ത ഒരു പെരുന്നാളിന്റെ ഭാഗമാകേണ്ടി വരുമെന്ന ചിന്തയും ഉസ്മാനെ വേദനിപ്പിക്കുന്നു. ആശുപത്രിയിലാണെങ്കിലും റിമാന്‍ഡില്‍ ആയതിനാല്‍ തിങ്കളാഴ്ച്ച കോടതിയില്‍ നിന്നും ജാമ്യം തേടാന്‍ സാധിക്കുമെന്ന പ്രതീക്ഷയിലാണ് ഉസ്മാന്‍.
എടത്തല കുഞ്ചാട്ടുകരയില്‍ കഴിഞ്ഞ ചൊവ്വാഴ്ച വൈകിട്ട് അഞ്ചരയോടെയാണ് സംഭവമുണ്ടായത്. എടത്തല പൊലിസ് സ്‌റ്റേഷനിലെ എ.എസ്.ഐ പുഷ്പരാജിനും മൂന്ന് സി.പി.ഓമാര്‍ക്കുമെതിരേയാണ് കേസ് രജിസ്റ്റര്‍ ചെയ്തത്. ബൈക്ക് പൊലിസുകാരന്റെ കാറില്‍ ഇടിച്ചെന്നാരോപിച്ച് ഉസ്മാനെ പിടികൂടി പൊലിസ് മര്‍ദിക്കുകയായിരുന്നെന്നാണ് പരാതി. കാറില്‍ കയറ്റികൊണ്ടു പോയ യുവാവിനെ കാറിലും സ്‌റ്റേഷനിലെത്തിച്ചും മര്‍ദിച്ചതായി ബന്ധുക്കള്‍ ആരോപിച്ചു. ഉസ്മാനെ മര്‍ദിച്ച് പരുക്കേല്‍പ്പിച്ച സംഭവത്തില്‍ നാല് പൊലിസുകാര്‍ക്കെതിരേ കേസ് രജിസ്റ്റര്‍ ചെയ്തിതിരുന്നു.