ദമാം: നാട്ടിലേക്ക് പോകാൻ ആഗ്രഹിക്കുന്ന എല്ലാ പ്രവാസികൾക്കും നാട്ടിൽ എത്താനുള്ള വിമാന സൗകര്യം ഉണ്ടാക്കാൻ കേന്ദ്ര-സംസ്ഥാന സർക്കാറുകൾ നടപടികൾ സ്വീകരിക്കണമെന്ന് നവയുഗം കേന്ദ്ര കമ്മിറ്റി ആവശ്യപ്പെട്ടു. നിർത്തി വെച്ചിരിക്കുന്ന രാജ്യാന്തര വിമാനസർവീസുകൾ പുനഃരാരംഭിക്കാൻ സംസ്ഥാന സർക്കാർ കേന്ദ്ര സർക്കാരിൽ സമ്മർദ്ദം ചെലുത്തണമെന്നും അനുമതി വാങ്ങിയ ശേഷം കേരള സർക്കാർ തന്നെ ചാർട്ടേർഡ് വിമാനങ്ങൾ ഏർപ്പാട് ചെയ്യണമെന്നും ആവശ്യപ്പെട്ടു. അടിയന്തരമായി നാട്ടിലെത്താന്‍ താൽപര്യമുള്ളവര്‍ക്ക് രജിസ്റ്റര്‍ ചെയ്യാന്‍ വെബ്പോര്‍ട്ടല്‍ ആരംഭിക്കുകയും രജിസ്റ്റർ പട്ടിക പ്രകാരം വിമാന യാത്രയുടെ മുന്‍ഗണനാക്രമം ഉണ്ടാക്കണമെന്ന ആവശ്യവും മുന്നോട്ട് വെച്ചിട്ടുണ്ട്. നാട്ടിലെത്തുന്നവര്‍ പതിവുപോലെ ക്വാറന്റീനിലേക്കോ, പ്രത്യേകം തയ്യാറാക്കിയ പ്രവാസി കൊവിഡ് ക്യാമ്പിലേക്കോ പോകാൻ സൗകര്യം ഒരുക്കുക, എല്ലാ പ്രവാസികൾക്കും മുന്തിയ ആരോഗ്യ പരിരക്ഷ ഉറപ്പാക്കുക എന്നതും പരിഗണിക്കണം.

കൂടാതെ, സഊദി സർക്കാർ പലതരം ഇളവുകൾ പ്രഖ്യാപിച്ചിട്ടും ഗൾഫിലെ ഇന്ത്യൻ സ്ക്കൂളുകൾ ഇപ്പോഴും പ്രവാസികളെ പിഴിഞ്ഞ് കൊണ്ടിരിക്കുകയാണെന്നും ട്യൂഷൻ ഫീസ്, അഡ്മിഷൻ ഫീസ് എന്നിവ കുടിശ്ശിക വരുത്തിയവരുടെ കുട്ടികളെ ഇപ്പോൾ ആരംഭിച്ച ഓൺലൈൻ ക്‌ളാസ്സുകളിൽ പങ്കെടുപ്പിക്കാത്ത അവസ്ഥ അടിയന്തരമായി ഇടപെട്ട് തിരുത്തിക്കുന്നതോടൊപ്പം അടുത്ത മൂന്നു മാസത്തെ ഫീസ് ഇളവ് ചെയ്തു കൊടുക്കാനുള്ള നിർദ്ദേശവും നൽകാൻ ഇന്ത്യൻ എംബസിയെ പ്രേരിപ്പിക്കണമെന്നും കമ്മിറ്റി ആവശ്യപ്പെട്ടു. കൊറോണ കാലത്തിനു ശേഷം സാമ്പത്തിക പ്രതിസന്ധി കാരണം ഒട്ടേറെ കുടുംബങ്ങൾക്ക് ഗൾഫിലെ ജീവിതം മതിയാക്കി നാട്ടിലേക്ക് മടങ്ങേണ്ട അവസ്ഥയാണിപ്പോളെന്നും ഗള്‍ഫില്‍നിന്നും വരുന്ന കുട്ടികള്‍ക്ക് അധ്യയന വർഷത്തിന്റെ ഏത് സമയമാണെങ്കിലും നാട്ടിലെ സ്‌കൂളുകളില്‍ പ്രവേശനം ഉറപ്പാക്കണമെന്നും നവയുഗം ആവശ്യപ്പെട്ടു. ഈ ആവശ്യങ്ങൾ ഉന്നയിച്ചു കേന്ദ്ര-സംസ്ഥാന സർക്കാരുകൾക്കും, ഇന്ത്യൻ എംബസ്സിയ്ക്കും നിവേദനങ്ങൾ നൽകുന്നത് ഉൾപ്പെടെയുള്ള പ്രവർത്തനങ്ങളുമായി കേന്ദ്രകമ്മിറ്റി മുന്നോട്ടു പോകുകയാണെന്നും നവയുഗം അറിയിച്ചു.