നെടുമ്പാശ്ശേരി : തന്നെ ഒഴിവാക്കുവാന്‍ വേണ്ടി ചെറുപ്പക്കാരെ ഉപയോഗിച്ച് അധിക്ഷേപിച്ചതിന് പിന്നില്‍ ഉമ്മന്‍ ചാണ്ടിയാണെന്ന് മുന്‍ രാജ്യസഭാ ഉപാധ്യക്ഷന്‍ പി.ജെ.കുര്യന്‍ ആരോപിച്ചു. ഡല്‍ഹിയില്‍ നിന്നും നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ വന്നിറങ്ങിയ അദ്ദേഹം മാധ്യമ പ്രവര്‍ത്തകരോട് സംസാരിക്കുകയായിരുന്നു.
2012 ല്‍ ആദ്യമായി തന്റെ സ്ഥാനാര്‍ത്ഥിത്വം വന്നപ്പോള്‍ മാത്രമാണ് മലബാറില്‍ നിന്നൊരാള്‍ വേണമെന്ന് ഉമ്മന്‍ചാണ്ടിയ്ക്ക് തോന്നിയതെന്ന് പി.ജെ കുര്യന്‍ പറഞ്ഞു. എന്നും അധികാര കേന്ദ്രങ്ങളില്‍ തങ്ങിനില്‍ക്കണമെന്ന ആഗ്രഹം തനിക്കുണ്ടായിട്ടില്ല. അധികാരത്തില്‍ തുടരണമെന്ന ആഗ്രഹവും ഇതുവരെ തോന്നിയിട്ടില്ല. ഞങ്ങള്‍ ഇരുവരും കോണ്‍ഗ്രസുകാര്‍ എന്ന നിലയില്‍ പരസ്പരം ഉപകാരങ്ങള്‍ ചെയ്തിട്ടുണ്ട്.
ഉമ്മന്‍ ചാണ്ടി ചെയ്ത ഉപകാരങ്ങള്‍ വിളിച്ചു പറയാന്‍ തുടങ്ങിയാല്‍ തനിയ്ക്കും ചില ഉപകാരങ്ങളെ കുറിച്ച് പറയാനുണ്ടെന്നും കുര്യന്‍ പറഞ്ഞു.
ഇപ്പോള്‍ മാത്രമാണ് ചെറുപ്പക്കാര്‍ വേണമെന്ന് ഉമ്മന്‍ ചാണ്ടിയുടെ അനുയായികള്‍ക്ക് തോന്നിയത്. ഇത് തന്നെ ഒഴിവാക്കുവാന്‍ വേണ്ടി മാത്രമായിരുന്നുവെന്നും കുര്യന്‍ കുറ്റപ്പെടുത്തി.