പാലക്കാട്: ഒരു പൂ ചോദിച്ചപ്പോള്‍ പൂന്തോട്ടം തന്നെ കിട്ടിയ ആഹ്ലാദത്തിലാണ് ഷൊര്‍ണൂര്‍ കുളപ്പുള്ളി മഹര്‍ഷി വിദ്യാമന്ദിര്‍ സ്‌കൂളിലെ അധ്യാപകരും വിദ്യാര്‍ഥികളും രക്ഷിതാക്കളും. ലുലു ഗ്രൂപ്പ് ചെയര്‍മാന്‍ എം.എ യൂസഫലി സ്‌കൂളിന് സമീപം സ്വകാര്യ പരിപാടിക്കായി മഹര്‍ഷി വിദ്യാമന്ദിര്‍ സ്‌കൂള്‍ ഗ്രൗണ്ടില്‍ ഹെലികോപറ്ററില്‍ വന്നിറങ്ങുമ്പോള്‍ ആരും പ്രതീക്ഷിച്ചിരുന്നില്ല അത് അധ്യാപകരുടെയും വിദ്യാര്‍ഥികളുടെയും ചിരകാല മോഹം സാക്ഷാത്കരിക്കുന്ന മുഹൂര്‍ത്തമായി മാറുമെന്ന്.
ഹെലികോപ്റ്ററില്‍ വന്നിറങ്ങിയ എം.എ യൂസഫലിയെ അധ്യാപകരും രക്ഷിതാക്കളും ചേര്‍ന്നാണ് സ്വീകരിച്ചത്. സ്‌കൂളിന്റെ ചില ആവശ്യങ്ങള്‍ അധ്യാപകരും രക്ഷിതാക്കളും യൂസഫലിയുടെ ശ്രദ്ധയില്‍ കൊണ്ടുവന്നു. തിരിച്ചു വരുമ്പോള്‍ കാണാമെന്ന് പറഞ്ഞ് പുറപ്പെട്ട യൂസഫലി തിരിച്ചെത്തിയപ്പോള്‍ സ്‌കൂളില്‍ ഒരു യോഗം സജ്ജമാക്കിയിരുന്നു.
പരിപാടിയില്‍ പങ്കെടുത്ത യൂസഫലി മുമ്പാകെ സ്‌കൂളിന് ഒരു കവാടം വേണമെന്ന ആവശ്യം രക്ഷിതാക്കള്‍ ശ്രദ്ധയില്‍ പെടുത്തി. അഞ്ച് ലക്ഷം രൂപയാണ് കവാടം നിര്‍മിക്കുന്നതിന് ചെലവ് കണക്കാക്കിയത്. എന്നാല്‍ പ്രധാന ആവശ്യം അതല്ല, കുട്ടികള്‍ക്കുള്ള ഒരു പാര്‍ക്കാണ് അടിയന്തരമായി വേണ്ടതെന്ന് അധ്യാപകരും വിദ്യാര്‍ഥികളും യൂസഫലിയെ അറിയിച്ചു. എന്നാല്‍ കവാടവും കുട്ടികളുടെ പാര്‍ക്കും നിര്‍മിക്കാന്‍ ആവശ്യമായ സഹായം നല്‍കാന്‍ യൂസഫലി സന്നദ്ധത അറിയിക്കുകയായിരുന്നു. നിനച്ചിരിക്കാതെ കൈവന്ന നേട്ടത്തിന്റെ അമ്പരപ്പിലും ആവേശത്തിലുമായിരുന്നു എല്ലാവരും.
പറഞ്ഞ വാക്ക് അദ്ദേഹം പാലിക്കുകയും ചെയ്തു. അടുത്ത ദിവസം തന്നെ 15 ലക്ഷം രൂപക്കുള്ള ചെക്കുമായി ലുലു ഗ്രൂപ്പ് ചെയര്‍മാന്‍ എം.എ യൂസഫലിയുടെ സെക്രട്ടറി ഇ.എ ഹാരീസ് സ്‌കൂളിലെത്തി അധികൃതര്‍ക്ക് കൈമാറി. സ്‌കൂളില്‍ നടന്ന ചടങ്ങില്‍ പ്രിന്‍സിപ്പാള്‍ വനജ മോഹന്‍ദാസ് ഏറ്റുവാങ്ങി.