പള്ളുരുത്തി: ശക്തമായ കാറ്റില്‍ തോപ്പുംപടിയില്‍ മൊബൈല്‍ ടവര്‍ തകര്‍ന്നുവീണു. തോപ്പുംപടി വാലുമ്മല്‍ റോഡില്‍ എം.എം കുരുവിളയുടെ ഉടമസ്ഥതയിലുള്ള കെട്ടിടത്തില്‍ സ്ഥാപിച്ചിരുന്ന മൊബൈല്‍ ടവറാണ് ഇന്നലെ വെളുപ്പിന് നാല് മണിയോടെയായിരുന്നു തകര്‍ന്നത്.
ടവര്‍ സ്ഥാപിച്ചിരുന്ന കെട്ടിടത്തില്‍ താഴെ നിലയില്‍ ഗോഡൗണും മുകളില്‍ കുടുംബവും താമസമുണ്ട്. വെളുപ്പിന് വലിയ ശബ്ദം കേട്ട് വീട്ടുകാര്‍ എഴുന്നേറ്റപ്പോഴാണ് ടവര്‍ രണ്ടായി ഒടിഞ്ഞു തൂങ്ങിയ നിലയില്‍ കണ്ടത്. തുടര്‍ന്ന് ഫയര്‍ഫോഴ്‌സ് സ്ഥലത്തെത്തി ടവര്‍ നീക്കുന്നതിനുള്ള ശ്രമം നടത്തുകയാണ്.
നിരവധിയാളുകള്‍ സഞ്ചരിക്കുന്ന റോഡിനു സമീപത്താണ് ടവര്‍ സ്ഥിതി ചെയ്തിരുന്നത്. സംഭവം വെളുപ്പിനായതിനാല്‍ കൂടുതല്‍ അപകടം സംഭവിച്ചില്ല.
ഫയര്‍ ഓഫീസര്‍ കെ.ജെ.തോമസിന്റെ നേതൃത്വത്തിലുള്ള സംഘമാണ് നേതൃത്വം നല്‍കുന്നത്.