കാഞ്ഞാര്‍: അജ്ഞാത വാഹനമിടിച്ച് ആശുപത്രി ജീവനക്കാരിക്ക് ഗുരുതര പരുക്ക്. ഇന്നലെ രാവിലെ 8.45ന് അറക്കുളം സെന്റ് തോമസ് സ്‌കൂള്‍ കവലയിലാണ് സംഭവം.കരിപ്പിലങ്ങാടിനു സമീപം അയ്യകാട് വെള്ളിശ്ശേരില്‍ രാജേന്ദ്രന്റെ ഭാര്യ മിനിമോള്‍ക്കാണ് പരുക്കേറ്റത്. പ്ലസ്ടുവിന് പഠിക്കുന്ന മകളെ അറക്കുളം സെന്റ് മേരീസ് സ്‌കൂളിലാക്കിയ ശേഷം സ്‌കൂട്ടറില്‍ ആശുപത്രിയിലേക്ക് പോകും വഴിയാണ് അപകടം. ആശുപത്രിക്ക് ഏതാനും മീറ്ററകലെയുള്ള കട്ടക്കളത്തിന് മുന്നിലായി തൊടുപുഴ-പുളിയന്‍മല സംസ്ഥാന പാതയില്‍ വച്ചാണ് അപകടം ഉണ്ടായത്. അതേ സമയം അതുവഴി വന്ന ഏതോ ഒരു വാഹനം മിനിയുടെ സ്‌കൂട്ടര്‍ ഇടിച്ച് തെറിപ്പിക്കുകയായിരുന്നുവെന്ന് സമീപത്തുണ്ടായിരുന്നവര്‍ പറഞ്ഞു. ശബ്ദം കേട്ട് ഓടിയെത്തിയ നാട്ടുകാരാണ് തലക്ക് ഗുരുതരമായി പരുക്കേറ്റ് ചോര വാര്‍ന്നു കിടന്ന മിനിയെ തൊടുപുഴയിലെ ആശുപത്രിയിലെത്തിച്ചത്. നില അതീവ ഗുരുതരമായതിനാല്‍ കോലഞ്ചേരി മെഡിക്കല്‍ കോളജിലേക്ക് മാറ്റി.