കോട്ടയം: സ്പ്രിംഗ്ലറുമായി ബന്ധപ്പെട്ട ആശങ്കകള്‍ നീക്കണമെന്ന് കേരള കോണ്‍ഗ്രസ്(എം) നിയമസഭാകക്ഷി സെക്രട്ടറി അഡ്വ. മോന്‍സ് ജോസഫ് ആവശ്യപ്പെട്ടു. കരാര്‍ സംബന്ധിച്ച കേസില്‍ ഹൈക്കോടതി പരാമര്‍ശങ്ങളോടെ പ്രശ്‌നത്തിന്റെ ഗൗരവം പതിന്മടങ്ങ് വര്‍ധിച്ചിരിക്കുകയാണ്. സര്‍ക്കാര്‍ സംവിധാനമായ സി-ഡിറ്റിന് സ്പ്രിംഗ്ലര്‍ കമ്പനിയെ ചുമതലപ്പെടുത്തിയ ജോലി ചെയ്യുന്നതിന് ശേഷിയുണ്ടായിരിക്കെ ജനങ്ങളുടെ സുപ്രധാന വിവരങ്ങള്‍ ശേഖരിക്കാന്‍ വിദേശ കമ്പനിയെ എന്തിന് ചുമതലപ്പെടുത്തിയെന്ന സംശയവും ഉയരുന്നുണ്ട്. ജനങ്ങളുടെ അറിയാനുള്ള അവകാശം ഉറപ്പുവരുത്തുന്നതിന് കമ്പനിയുമായുണ്ടാക്കിയ കരാറിന്റെ മുഴുവന്‍ വിശദാംശങ്ങളും വെളിപ്പെടുത്താന്‍ മുഖ്യമന്ത്രിയും സര്‍ക്കാരും തയാറാകണമെന്നും അദ്ദേഹം ആവശ്യപ്പെട്ടു.