തിരുവനന്തപുരം: സംസ്ഥാന സീനിയര്‍, യൂത്ത് അത്‌ലറ്റിക് ചാംപ്യന്‍ഷിപ്പ് ഇന്നും നാളെയുമായി തിരുവനന്തപുരത്ത്. അന്തരിച്ച ഡോ. ടോണി ഡാനിയേലിന്റെ ഓര്‍മയ്ക്കായാണ് ഇത്തവണ മുതല്‍ സീനിയര്‍ അത്‌ലറ്റിക് ചാംപ്യന്‍ഷിപ്പ് നടത്തുന്നത്. എട്ടാമത് ഒളിംപ്യന്‍ സുരേഷ് ബാബു മെമ്മോറിയല്‍ യൂത്ത് അത്‌ലറ്റിക് ചാംപ്യന്‍ഷിപ്പും ഇതോടൊപ്പം നടക്കും. രാവിലെ 6.15ന് അണ്ടര്‍ 18 ആണ്‍കുട്ടികളുടെ 10000 മീറ്റര്‍ നടത്ത മത്സരത്തോടെയാണ് ചാംപ്യന്‍ഷിപ്പിന് ട്രാക്കുണരുന്നത്. ആദ്യ ദിനത്തില്‍ സീനിയര്‍, യൂത്ത് വിഭാഗങ്ങളിലായി 39 ഫൈനലുകള്‍ നടക്കും. ഉച്ച കഴിഞ്ഞ് 3.30 ന് സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ ചാംപ്യന്‍ഷിപ്പുകളുടെ ഉദ്ഘാടനം നിര്‍വഹിക്കും. 600 കായിക താരങ്ങളാണ് ഇരു വിഭാഗങ്ങളിലുമായി പങ്കെടുക്കുന്നത്. സീനിയര്‍ ചാംപ്യന്‍ഷിപ്പില്‍ കോട്ടയം ജില്ലയും യൂത്ത് ചാംപ്യന്‍ഷിപ്പില്‍ പാലക്കാടുമാണ് നിലവിലെ കിരീട ജേതാക്കള്‍. ചന്ദ്രശേഖരന്‍ നായര്‍ സ്റ്റേഡിയത്തിലാണ് മത്സരങ്ങള്‍ അരങ്ങേറുന്നത്.