കൊച്ചി: പുറംകടലില്‍ ചരക്ക് കപ്പലിന് തീപിടിച്ച് ഒരാള്‍ മരിച്ചു. ഗുജറാത്തിലെ മുന്ദ്രയില്‍ നിന്നും കൊളൊംബോയിലേക്ക് നാഫ്തയുമായി പോകുകയായിരുന്ന എം.വി നളിനി എന്ന ചരക്ക് കപ്പലിലാണ് തീപിടിത്തമുണ്ടായത്.
22 പേരാണ് കപ്പലിലുണ്ടായിരുന്നതെന്നും ഇതില്‍ ഒരാള്‍ക്കു ഗുരതരമായി പൊള്ളലേറ്റിട്ടുണ്ടെന്നും രക്ഷാപ്രവര്‍ത്തനം നടന്നുവരികയാണെന്നും നാവികസേന പറഞ്ഞു.
ഇദ്ദേഹത്തിന് 80 ശതമാനം പൊള്ളലേറ്റിരുന്നു. കൊച്ചി തീരത്ത് നിന്നും 14.5 നോട്ടിക്കല്‍ മൈല്‍ അകലെയാണ് സംഭവം. കപ്പലിന്റെ എന്‍ജിന്‍ റൂമിലുണ്ടായ പൊട്ടിത്തെറിയാണ് തീപിടിത്തത്തിനു കാരണമെന്നാണ് അനുമാനം.
കപ്പലിലെ വൈദ്യുതി സംവിധാനം പൂര്‍ണമായും തകരാറിലായി. സ്ഥിതി നിയന്ത്രവിധേയമായതായും അപകടത്തില്‍ പെട്ടയാളെയും കപ്പലില്‍ കുടുങ്ങിയിട്ടുള്ള മറ്റുള്ളവരെയും ഉടന്‍ രക്ഷപെടുത്തുമെന്നും നാവിക സേന അറിയിച്ചു.