മ്യൂണിക്ക്: ജര്‍മന്‍ ബുണ്ടസ്‌ലിഗയില്‍  എതിരാളികളില്ലാതെ കുതിക്കുന്ന കുതിക്കുന്ന ബയേണിന് അപ്രതീക്ഷിത തിരിച്ചടി. എതിരില്ലാത്ത ഒരു ഗോളിന് ഹോഫന്‍ഹെയിം അവരെ പരാജയപ്പെടുത്തി. ആന്ദ്രേ ക്രാമറിക്  ആണ് ഹോഫന്‍ഹെയിമിന്റെ വിജയ ഗോള്‍ സ്വന്തമാക്കിയത്.
അപരാജിതമായ 20 മത്സരങ്ങള്‍ക്ക് ശേഷമാണ് ബയേണ്‍ തോല്‍വി വഴങ്ങുന്നത്. ഹോഫന്‍ഹെയിം ബയേണിനെതിരേ നേടുന്ന ആദ്യ ജയം കൂടിയാണിത്.
സൂപ്പര്‍ താരങ്ങളുണ്ടായിട്ടും കഴിവിനൊത്ത പ്രകടനം കാഴ്ച്ചവയ്ക്കാന്‍ ബയേണിന് സാധിച്ചില്ല. 21ാം മിനുട്ടില്‍ മികച്ചൊരു ലോങ് റോഞ്ചറിലൂടെ ക്രാമറിക് ബയേണിന്റെ വലകുലുക്കിയത്. വിജയത്തിന് ഇത് ധാരാളം മതിയായിരുന്നു.
ആദ്യ പകുതിയില്‍ തിരിച്ചടിക്കാനായി ഓടി നടന്ന ബയേണിന് റോബര്‍ട്ട് ലെവന്‍ഡോസ്‌കിയുടെ ചില നീക്കങ്ങള്‍ മാത്രമാണ് ആശ്വാസം പകര്‍ന്നത്. താരത്തിന്റെ മികച്ചൊരു ഷോട്ട് ഹോഫന്‍ഹെയിമിന്റെ പോസ്റ്റില്‍ തട്ടി പുറത്തേക്ക് പോവുകയായിരുന്നു.
ഗോള്‍ നേടിയ ശേഷവും ഹോഫന്‍ഹെയിം മികച്ച നീക്കങ്ങളാണ് നടത്തിയത്. പക്ഷേ ഫിനിഷിങിലെ പിഴവാണ് ടീമിന് തിരിച്ചടിയായത്. ക്രാമറിക് നല്‍കിയ മികച്ച പാസുകള്‍  നദീം അമിരിയും കെരം ഡെമിര്‍ബേയും നഷ്ടപ്പെടുത്തി.
അതേസമയം തോല്‍വി ബയേണിന് വരും മത്സരങ്ങളില്‍ സമ്മര്‍ദമുണ്ടാക്കും. ബൊറൂസിയ ഡോര്‍ട്മുണ്ട്, റയല്‍ മാഡ്രിഡ് എന്നിവരുമായിട്ടാണ് ടീമിന്റെ അടുത്ത മത്സരങ്ങള്‍. മറ്റു മത്സരങ്ങളില്‍ ബൊറൂസിയ ഡോര്‍ട്മുണ്ട് എതിരില്ലാത്ത മൂന്നു ഗോളിന് ഹാംബര്‍ഗറെ പരാജയപ്പെടുത്തിയപ്പോള്‍ കോളിന്‍ എതിരില്ലാത്ത ഒരു ഗോളിന് ഐന്‍ത്രാഷിനെയും വെര്‍ഡര്‍ ബ്രമന്‍ എതിരില്ലാത്ത മൂന്നു ഗോളുകല്‍ക്ക് ഷാല്‍ക്കെയെയും പരാജയപ്പെടുത്തി. ഹാംബര്‍ഗറിനെതിരേ കാസ്‌ട്രോ, കഗാവ, ഓബമേയാങ് എന്നിവര്‍ ബൊറൂസിയക്കായി സ്‌കോര്‍ ചെയ്തു.