ന്യൂഡല്‍ഹി: കല്‍ബുര്‍ഗി വധക്കേസ് ഗൗരി ലങ്കേഷ് വധം അന്വേഷിക്കുന്ന പ്രത്യേക അന്വേഷണ സംഘത്തെ ഏല്‍പ്പിക്കാന്‍ സുപ്രിംകോടതി ഉത്തരവിട്ടു.

ഇരു കൊലകളും തമ്മില്‍ സാമ്യമുണ്ടെന്ന് നിരീക്ഷിച്ചുകൊണ്ടാണ് ജസ്റ്റിസുമാരായ ആര്‍.എഫ് നരിമാന്‍, വിനീത് സരണ്‍ എന്നിവരടങ്ങിയ ബെഞ്ചിന്റെ ഉത്തരവ്.
കര്‍ണാടക സര്‍ക്കാര്‍ രൂപീകരിച്ച പ്രത്യേക അന്വേഷണ സംഘം കല്‍ബുര്‍ഗി വധം കൂടി അന്വേഷിക്കണമെന്നാണ് കോടതി ഉത്തരവ്.

കല്‍ബുര്‍ഗി കേസില്‍ സി.ബി.ഐ അന്വേഷണം ആവശ്യപ്പെട്ട് കല്‍ബുര്‍ഗിയുടെ വിധവ ഉമാദേവി സമര്‍പ്പിച്ച ഹരജിയിലാണ് സുപ്രിംകോടതി ഉത്തരവ്. നരേന്ദ്ര ദാബോല്‍ക്കര്‍, ഗോവിന്ദ് പന്‍സാരെ, ഗൗരി ലങ്കേഷ് എന്നിവരുടെ കൊലകള്‍ കല്‍ബുര്‍ഗി വധവുമായി ബന്ധപ്പെട്ട് കിടക്കുന്നതാണെന്ന് ഉമാദേവി ഹരജിയില്‍ ചൂണ്ടിക്കാട്ടിയിരുന്നു.

ദാബോല്‍ക്കര്‍ കേസ് നിലവില്‍ സി.ബി.ഐയാണ് അന്വേഷിക്കുന്നത്.
ദാബോല്‍ക്കറുടെ കൊലയും ലങ്കേഷിന്റെ കൊലയും തമ്മില്‍ പരസ്പര ബന്ധമുണ്ടെന്ന് ഓഗസ്റ്റില്‍ സി.ബി.ഐ പൂനെ കോടതിയെ അറിയിച്ചിരുന്നു. അന്ധവിശ്വാസങ്ങള്‍ക്കെതിരേ പൊരുതുന്ന പൂനെയ്ക്കാരനായ ആക്ടിവിസ്റ്റാണ് ദാബോല്‍ക്കര്‍. ഒരേ സംഘമാണ് മൂന്നു പേരെയും കൊലപ്പെടുത്തിയതെങ്കില്‍ കേസ് ഒരു ഏജന്‍സി അന്വേഷിക്കുന്നതാണ് നല്ലതെന്നായിരുന്നു ജസ്റ്റിസ് നരിമാന്റെ നിലപാട്. എന്നാല്‍ നിലവില്‍ ഗൗരി കേസ് അന്വേഷിക്കാന്‍ പ്രത്യേക അന്വേഷണ സംഘത്തിന് രൂപം നല്‍കിയിട്ടുണ്ടെന്ന് കര്‍ണാടക സര്‍ക്കാര്‍ കോടതിയെ അറിയിച്ചു.

ഇതിന്റെ അടിസ്ഥാനത്തില്‍ ഈ കേസ് കൂടി പ്രത്യേക സംഘം അന്വേഷിക്കട്ടെയെന്ന് കോടതി ഉത്തരവിടുകയായിരുന്നു.

കര്‍ണാടക ഹൈക്കോടതിയിലെ ദര്‍വാദ് ബെഞ്ചിന്റെ മേല്‍നോട്ടത്തിലാണ് ഗൗരി ലങ്കേഷ് കേസിന്റെ അന്വേഷണം നടക്കുന്നത്.