താമരശേരി: കട്ടിപ്പാറയിലെ കരിഞ്ചോലമലയില്‍ നടന്ന ഉരുള്‍പൊട്ടലില്‍ മരിച്ചവരുടെ എണ്ണം 13 ആയി. ഇന്നലെ നടത്തിയ തിരച്ചിലില്‍ കരിഞ്ചോല ഹസന്റെ ഭാര്യ ആസിയയുടെ (52) മൃതദേഹം കണ്ടെടുത്തു. ഇന്നലെ ഉച്ചക്ക് 1.30ഓടെ മലയുടെ താഴ്‌വാരത്തുനിന്നാണ് മൃതദേഹം കണ്ടെടുത്തത്. കഴിഞ്ഞ ദിവസം നാല് മൃതദേഹങ്ങള്‍ കണ്ടെത്തിയ സ്ഥലത്തുനിന്നാണ് ഇവരുടെയും മൃതദേഹം ലഭിച്ചത്.
ഇന്‍ക്വസ്റ്റ് നടപടികള്‍ക്കുശേഷം വൈകിട്ടോടെ വെട്ടിയൊഴിഞ്ഞ തോട്ടം ജുമാ മസ്ജിദ് ഖബര്‍സ്ഥാനില്‍ മൃതദേഹം ഖബറടക്കി. ശനിയാഴ്ച ഹസന്റെ മകള്‍ നുസ്‌റത്ത് (26), പേരക്കുട്ടി റിന്‍ഷ മെഹ്‌റിന്‍ (നാല്), മകന്‍ റാഫിയുടെ ഭാര്യ ഷംന (23), റാഫിയുടെ മകള്‍ നിയാ ഫാത്തിമ (മൂന്ന്) എന്നിവരുടെ മൃതദേഹങ്ങള്‍ കണ്ടെത്തിയിരുന്നു. അബ്ദുറഹിമാന്റെ ഭാര്യ നഫീസയെയാണ് ഇനി കണ്ടെത്താനുള്ളത്. തിരച്ചിലിനായി ഇന്നലെ ലാന്‍ഡ് സ്‌കാനറും ഉപയോഗിച്ചിരുന്നു.