ഹരിപ്പാട്: നെല്ലുചാക്കുകള്‍ ഏറെ ഉയരത്തില്‍ അടുക്കിവന്ന ലോറി റെയില്‍വേ ക്രോസില്‍പ്പെട്ടു. ലിഫ്റ്റ് ബാരിയര്‍ മറികടക്കാന്‍ കഴിയാതെവന്നപ്പോള്‍ നെല്ലുചാക്കുകള്‍ ഇറക്കി.
ഇത് ടെമ്പോയില്‍ കയറ്റിയാണ് ലെവല്‍ ക്രോസ് കടന്നത്. വ്യാഴാഴ്ച വൈകുന്നേരം തൃപ്പക്കുടം ലെവല്‍ ക്രോസിലായിരുന്നു സംഭവം. ഇത് അല്പനേരം ഗതാഗതതടസ്സവുമുണ്ടാക്കി.
 ചെറുതന ഭാഗത്തുനിന്ന് നെല്ല് കയറ്റിയാണ് ലോറി വന്നത്. ലോറികളില്‍ അനുവദനീയമായതിനേക്കാള്‍ ഏറെ ഉയരത്തിലാണ് നെല്ലുചാക്കുകള്‍ അടുക്കുന്നത്. ഇത് അപകടങ്ങള്‍ക്കിടയാക്കുമെങ്കിലും ബന്ധപ്പെട്ടവര്‍ ശ്രദ്ധിക്കുന്നില്ല. പാടശേഖരങ്ങളിലെ ചെറിയ വഴികളിലൂടെയാണ് പലപ്പോഴും ഇത്തരം ലോറികള്‍ പോകുന്നത്.