ബെയ്ജിങ്: അമേരിക്കന്‍ പ്രസിഡന്റ് തെരഞ്ഞെടുപ്പില്‍ തന്നെ പരാജയപ്പെടുത്താന്‍ ചൈന ശ്രമിക്കുന്നെന്ന യു.എസ് പ്രസിഡന്റ് ഡൊണാള്‍ഡ് ട്രംപിന്റെ ആരോപണത്തിനു പിന്നാലെ മറുപടിയുമായി ചൈന. അത്തരം കാര്യങ്ങളില്‍ തങ്ങള്‍ക്കു താല്‍പര്യമില്ലെന്നും അതല്ല തങ്ങളുടെ ജോലിയെന്നും ചൈനീസ് വിദേശകാര്യ മന്ത്രാലയ വക്താവ് ഗെങ് ഷ്യുവാങ് പറഞ്ഞു. അമേരിക്കന്‍ പ്രസിഡന്റ് തെരഞ്ഞെടുപ്പില്‍ ഇടപെടാന്‍ ചൈനയ്ക്കു താല്‍പര്യമില്ല. അവിടത്തെ തെരഞ്ഞെടുപ്പ് രാഷ്ട്രീയത്തിലേക്ക് ചൈനയെ വലിച്ചിഴക്കുന്ന തന്ത്രം അമേരിക്കയിലെ ജനങ്ങള്‍ മനസിലാക്കുമെന്നാണ് തങ്ങള്‍ പ്രതീക്ഷിക്കുന്നതെന്നും അദ്ദേഹം പറഞ്ഞു. ശത്രു കൊറോണ വൈറസാണ്, ചൈനയല്ലെന്ന് അമേരിക്ക മനസിലാക്കണമെന്നും അദ്ദേഹം വ്യക്തമാക്കി. നേരത്തെ, അമേരിക്കയിലെ ചില രാഷ്ട്രീയക്കാര്‍ കള്ളം പറയുന്നെന്ന് ആരോപിച്ചും ചൈന രംഗത്തെത്തിയിരുന്നു.