റിയാദ്: സഊദിയില്‍ സ്വകാര്യ മേഖലയില്‍ ജോലി ചെയ്യുന്ന സ്വദേശ, വിദേശ തൊഴിലാളികളുടെ അവകാശ സംരക്ഷണത്തിനായി തൊഴിലാളികളുമായുള്ള ഓണ്‍ലൈന്‍ കരാര്‍ നിര്‍ബന്ധമാക്കി. തൊഴിലാളികള്‍ക്കൊപ്പം തൊഴിലുടമകളുടെയും അവകാശങ്ങള്‍ സംരക്ഷിക്കുന്നതിനായി തൊഴില്‍, സാമൂഹിക വികസന മന്ത്രാലയമാന് പുതിയ തീരുമാനം കൈകൊണ്ടത്.

സ്വകാര്യ മേഖലയില്‍ ജോലി ചെയ്യുന്ന സഊദികളുടെയും വിദേശികളുടെയും തൊഴില്‍ കരാറുകള്‍ രജിസ്റ്റര്‍ ചെയ്യുന്നതിനും കരാറുകളുമായി ബന്ധപ്പെട്ട വിവരങ്ങള്‍ പുതുക്കുന്നതിനും ഓണ്‍ലൈന്‍ വഴിയുള്ള പുതിയ പദ്ധതി തൊഴിലുടമകള്‍ക്ക് അവസരമൊരുക്കും.
പുതുതായി തൊഴിലിനു വെക്കുന്ന ജീവനക്കാരുടെ കരാറുകള്‍ ഉടന്‍ തന്നെ നടപ്പാക്കുമെങ്കിലും പഴയ തൊഴിലാളികളുടെ കരാറുകള്‍ ഘട്ടം ഘട്ടമായാണ് രജിസ്റ്റര്‍ ചെയ്യേണ്ടത്. സ്ഥാപനങ്ങളുടെ തൊഴിലാളികളുടെ എണ്ണത്തിനുസരിച്ചാണ് ഇക്കാര്യം നടപ്പിലാക്കുക. ഒന്നു മുതല്‍ അമ്പതു വരെ ജീവനക്കാരുള്ള സ്ഥാപനങ്ങളില്‍ ഈ വര്‍ഷം മൂന്നാം പാദം മുതല്‍ രജിസ്റ്റര്‍ ചെയ്തു തുടങ്ങണം.

തുടക്കത്തില്‍ പത്തു ശതമാനം തൊഴിലാളികളുടെ കരാറുകളാണ് രജിസ്റ്റര്‍ ചെയ്യേണ്ടത്. 50 മുതല്‍ 499 വരെ ജീവനക്കാരുള്ള ഇടത്തരം സ്ഥാപനങ്ങളിലെയും 500 മുതല്‍ 2999 വരെ ജീവനക്കാരുള്ള വന്‍കിട സ്ഥാപനങ്ങളിലെയും പത്തു ശതമാനം തൊഴിലാളികളുടെ കരാറുകളും തുടക്കത്തില്‍ രജിസ്റ്റര്‍ ചെയ്യണം. മൂവായിരവും അതില്‍ കൂടുതലും ജീവനക്കാരുള്ള ഏറ്റവും വലിയ കമ്പനികളിലെ 30 ശതമാനം ജീവനക്കാരുടെ കരാറുകളാണ് ആദ്യം രജിസ്റ്റര്‍ ചെയ്യേണ്ടത്. ഇത്തരം സ്ഥാപനങ്ങളിലെ മുഴുവന്‍ ജീവനക്കാരുടെയും തൊഴില്‍ കരാറുകള്‍ ഈ വര്‍ഷം അവസാനിക്കുന്നതിനു മുമ്പായി ഓണ്‍ലൈന്‍ വഴി രജിസ്റ്റര്‍ ചെയ്യല്‍ നിര്‍ബന്ധമാണ്.

സഊദിയില്‍ സ്വകാര്യ മേഖലയില്‍ പതിനേഴു ലക്ഷത്തിലേറെ സഊദികളും 85 ലക്ഷത്തോളം വിദേശികളും ജോലി ചെയ്യുന്നുണ്ടെന്നാണ് കണക്ക്. രണ്ടു വര്‍ഷത്തിനിടെ പതിനാറു ലക്ഷത്തോളം വിദേശികള്‍ ഫൈനല്‍ എക്‌സിറ്റില്‍ സ്വദേശങ്ങളിലേക്ക് മടങ്ങിയിട്ടുണ്ട്. ഏറ്റവും പുതിയ കണക്കുകള്‍ പ്രകാരം സ്വദേശികള്‍ക്കിടയിലെ തൊഴിലില്ലായ്മ നിരക്ക് 12.8 ശതമാനമാണ്.