ചേലക്കര: നവോദയ പാഠ്യപദ്ധതിയുടെ ഭാഗമായി രാജസ്ഥാന്‍ ഡോങ്ക് നവോദയയില്‍നിന്ന് മായന്നൂര്‍ നവോദയയിലേക്കു വന്ന് ലോക്ക് ഡൗണില്‍ കുടുങ്ങിയ 23 രാജസ്ഥാനി വിദ്യാര്‍ഥികള്‍ ജന്മനാട്ടിലേക്ക് മടങ്ങി. 15 ആണ്‍കുട്ടികളും എട്ടു പെണ്‍കുട്ടികളും അടങ്ങുന്ന സംഘമാണ് വിദ്യാഭ്യാസ ഗുണനിലവാരം മെച്ചപ്പെടുത്തല്‍ പദ്ധതിയുടെ ഭാഗമായി മായന്നൂരില്‍ എത്തിയിരുന്നത്. ഹൃസ്വകാല കോഴ്‌സ് കഴിഞ്ഞ് മാര്‍ച്ച് 31ന് മുന്‍പ് ഇവര്‍ തിരിച്ച് പോകേണ്ടതായിരുന്നു. രാജസ്ഥാനില്‍ നിന്നെത്തിയ എല്ലാ സൗകര്യങ്ങളോടെയുമുള്ള പ്രത്യേക ബസിലാണ് ഇന്നലെ ഉച്ചക്ക് ഇവര്‍ യാത്രയായത്. ആരോഗ്യ പരിശോധനകള്‍ പൂര്‍ത്തീകരിച്ച് സര്‍ട്ടിഫിക്കറ്റുകള്‍ വിതരണം ചെയ്തു. യാത്രയാക്കാന്‍ മന്ത്രി എ.സി മൊയ്തീന്‍, ജില്ലാ കലക്ടര്‍ എസ്. ഷാനവാസ്, എം.എല്‍.എ യു.ആര്‍ പ്രദീപ് എന്നിവരും എത്തിയിരുന്നു.