ന്യൂഡല്‍ഹി: രാജ്യത്തെ കൊവിഡ് മഹാമാരിയില്‍ നിന്ന് രക്ഷിക്കാനായി കച്ചകെട്ടിയിറങ്ങിയ ആരോഗ്യപ്രവര്‍ത്തകര്‍ക്ക് സല്യൂട്ട് നേര്‍ന്ന് സൈന്യം. കരസേനയ്ക്കു പുറമെ വായുസേനയും നാവികസേനയും ആരോഗ്യപ്രവര്‍ത്തകരെ അഭിനന്ദിച്ചു.
ആരോഗ്യപ്രവര്‍ത്തകരുടെയും പൊലിസിന്റെയും മേല്‍ ഇന്ത്യന്‍ വ്യോമസേനയുടെ വിമാനങ്ങള്‍ പുഷ്ടപവൃഷ്ടി നടത്തി. വ്യോമസേന വേറെയും പ്രകടനങ്ങള്‍ കാഴ്ചവച്ചു. ശ്രീനഗറിലെ ദാല്‍ തടാകത്തിനു മുകളിലൂടെ വ്യോമസേനാ വിമാനങ്ങള്‍ പറന്നുയര്‍ന്നു. കപ്പലിന്റെ മുകള്‍ത്തട്ടില്‍ പ്രതീകാത്മകമായി കൊറോണ വൈറസിനെ വച്ച് അതിനെ ഇടിച്ചുകൊണ്ടാണ് നാവികസേനയുടെ ഐ.എന്‍.എസ് വിക്രമാദിത്യ ആരോഗ്യപ്രവര്‍ത്തകര്‍ക്ക് ആദരം അര്‍പ്പിച്ചത്. സൈന്യത്തിനോട് പ്രതിരോധമന്ത്രി രാജ്‌നാഥ് സിങ് നന്ദി പറഞ്ഞു. ഡല്‍ഹി എയിംസിലെ ഡോക്ടറും റസിഡന്റ് ഡോക്ടേഴ്‌സ് അസോസിയേഷന്‍ ജനറല്‍ സെക്രട്ടറിയുമായ ശ്രീനിവാസ് രാജ്കുമാറും സായുധസേനയ്ക്ക് നന്ദി അറിയിച്ചു.