കാഞ്ഞങ്ങാട്: ഹോട്ടലിലെ ലിഫ്റ്റില്‍ കുടുങ്ങിയവരെ അഗ്നിശമന സേന രക്ഷപ്പെടുത്തി. അജാനൂര്‍ മടിയന്‍ ജങ്ഷനിലുള്ള ഹോട്ടല്‍ റൊമായില്‍ വെള്ളിയാഴ്ച രാത്രി 11 മണിയോടെയാണ് സംഭവം. മുകളിലത്തെ നിലയില്‍നിന്ന്്് ഭക്ഷണം കഴിച്ചശേഷം രണ്ടു മുതിര്‍ന്നവരും എഴു കുട്ടികളും അടങ്ങുന്ന സംഘം ലിഫ്റ്റില്‍ താഴത്തെ നിലയിലെത്തിയെങ്കിലും ലിഫ്റ്റിന്റെ വാതില്‍ തുറന്നില്ല. അരമണിക്കൂര്‍ കഴിഞ്ഞിട്ടും വാതില്‍ തുറക്കാന്‍ കഴിയാതായതോടെ കുട്ടികള്‍ നിലവിളിച്ചു. ഇതോടെ ഹോട്ടല്‍ ജീവനക്കാര്‍ അഗ്നിശമന സേനയെ വിളിക്കുകയായിരുന്നു.
ലീഡിങ് ഫയര്‍മാന്‍ എ. അശോകന്‍, ഫയര്‍മാന്മാരായ വി.എന്‍ വേണുഗോപാല്‍, വി.വി ദിലീപ്, കെ. ശ്രീജിത്ത്, ഇ.എസ് ജയശങ്കര്‍, ഹോംഗാര്‍ഡ് കെ. രമേശന്‍ എന്നിവരുടെ നേതൃത്വത്തിലെത്തിയ സംഘം ഹൈഡ്രോളിക് സ്‌പ്രെഡര്‍ എന്ന ഉപകരണം കൊണ്ട് വാതില്‍ അകത്തി ഒന്‍പതുപേരെയും പുറത്തിറക്കുകയായിരുന്നു.