മുത്തങ്ങ (വയനാട്): അയല്‍ സംസ്ഥാനങ്ങളില്‍നിന്ന് ഇന്നലെ മുത്തങ്ങ വഴി കേരളത്തിലേക്ക് എത്തിയത് 275 പേര്‍. 119 വാഹനങ്ങളിലായാണ് ഇത്രയും പേര്‍ എത്തിയത്. തിങ്കളാഴ്ച 262 പേര്‍ അതിര്‍ത്തി കടന്നെത്തിയിരുന്നു. പ്രത്യേക അനുമതിയുമായി എത്തിയവരാണ് തിങ്കളാഴ്ച സംസ്ഥാനത്തേക്ക് പ്രവേശിച്ചത്.

 മുത്തങ്ങ വഴി വെള്ളിയാഴ്ച മുതല്‍ 1,000 പേര്‍ക്ക് പ്രവേശനം നല്‍കാന്‍ ഗതാഗത മന്ത്രി എ.കെ ശശീന്ദ്രന്റെ അധ്യക്ഷതയില്‍ വയനാട് കലക്ടറേറ്റില്‍ ചേര്‍ന്ന യോഗം തീരുമാനിച്ചു. നിലിവില്‍ 400 പേര്‍ക്കാണ് പ്രവേശനാനുമതി. ആളുകളുടെ എണ്ണം വര്‍ധിപ്പിക്കുന്നതിന്റെ ഭാഗമായി മുത്തങ്ങ കല്ലൂര്‍ 67ല്‍ ഒരുക്കിയ മിനി ആരോഗ്യകേന്ദ്രത്തില്‍ പരിശോധനാ കൗണ്ടറുകള്‍ വര്‍ധിപ്പിക്കാനും തീരുമാനിച്ചിട്ടുണ്ട്.