തലപ്പുഴ: കാല്‍നട യാത്രക്കാര്‍ക്കും വാഹനങ്ങള്‍ക്കും ഭീഷണിയായി റോഡരികിലെ ഉണങ്ങിയ വന്‍മരം. തലപ്പുഴ ചുങ്കത്ത് തലശ്ശേരി-മാനന്തവാടി പാതക്കരികില്‍ ഉണങ്ങിയ വന്‍മരമാണ് യാത്രക്കാര്‍ക്കും വാഹനങ്ങള്‍ക്കും ഭീഷണിയാവുന്നത്. ഇത് സ്വകാര്യ വ്യക്തിയുടെ കൈവശമുള്ള സ്ഥലത്താണ് നില്‍ക്കുന്നത്.
അതുകൊണ്ട് തന്നെ നാട്ടുകാര്‍ ഇവരോട് പലപ്രാവശ്യം മരത്തിന്റെ അപകടാവസ്ഥ ശ്രദ്ധയില്‍പ്പെടുത്തിയിരുന്നു. എന്നാല്‍ ഇവരുടെ ഭാഗത്തുനിന്നും അനുകൂല നടപടിയൊന്നും ഉണ്ടായില്ലെന്നാണ് നാട്ടുകാര്‍ പറയുന്നത്. തൊട്ടടുത്ത്  വൈദ്യുതിലൈന്‍ കടന്നുപോകുന്നുണ്ട്. മരംപൊട്ടി വീഴുകയോ മറ്റോ സംഭവിച്ചാല്‍ വന്‍ദുരന്തമാണ് സംഭവിക്കുക.
ഇനിയും ഇതിനെ നിസാരവല്‍ക്കരിച്ചാല്‍ വന്‍ദുരന്തമാകും സംഭവിക്കുക. സ്ഥലമുടമയുടെ ഭാഗത്തുനിന്നും പ്രതികരണമില്ലാത്ത സ്ഥിതിക്ക് പഞ്ചായത്ത് മുന്‍കൈയെടുത്ത് ഒഴിവാക്കാനുള്ള ശ്രമങ്ങള്‍ നടത്തണമെന്നാണ് നാട്ടുകാരുടെ ആവശ്യം. ഇതിനായി പഞ്ചായത്ത് അധികൃതരെ സമീപിക്കാനൊരുങ്ങുകയാണ് പ്രദേശവാസികള്‍.