കൊച്ചി: കേരളത്തില്‍നിന്ന് രക്ഷയുടെ കപ്പലും കാത്ത് ലക്ഷദ്വീപില്‍ കുടുങ്ങിക്കിടക്കുന്നത് മുന്നൂറോളം മലയാളികള്‍. ലോക്ക്ഡൗണിന് മുമ്പ് വിവിധ ആവശ്യങ്ങള്‍ക്കായി ദ്വീപിലെത്തിയ മലയാളികളാണ് തിരികെ വരാന്‍ സര്‍ക്കാരിന്റെ കനിവും കാത്ത് കഴിയുന്നത്. 

 

ഗള്‍ഫിലും ഇതര സംസ്ഥാനങ്ങളിലും കുടുങ്ങിയ മലയാളികളെ പ്രത്യേക വിമാന-കപ്പല്‍ സര്‍വിസുകള്‍ വഴി നാട്ടിലെത്തിക്കാന്‍ തീരുമാനമായ സാഹചര്യത്തില്‍ തങ്ങളുടെ കാര്യവും അനുഭാവപൂര്‍വം പരിഗണിക്കണമെന്നാണ് ഇവരുടെ ആവശ്യം.

 

കവരത്തി, അമിനി, കില്‍ത്താന്‍, അഗത്തി, ആന്ത്രോത്ത്, കല്‍പേനി, കടമത്ത്, ബിത്ര, മിനിക്കോയ് തുടങ്ങിയ ദ്വീപുകളിലാണ് മലയാളികള്‍ കുടുങ്ങിക്കിടക്കുന്നത്. സ്ത്രീകളും കുട്ടികളും ഉള്‍പ്പെടെയുള്ളവരാണ് ഇങ്ങനെ നാട്ടിലേക്ക് മടങ്ങാന്‍ വഴിയില്ലാതെ വിഷമിക്കുന്നത്.വിനോദ സഞ്ചാരികളായി എത്തിയ കുടുംബങ്ങളും കച്ചവട ആവശ്യത്തിന് എത്തിയവരുമൊക്കെ കൂട്ടത്തിലുണ്ട്. ഒപ്പം, ലക്ഷദ്വീപിലെ സ്‌കൂളുകളില്‍ അധ്യാപകരായി ജോലി ചെയ്യുന്നവരും വെക്കേഷന്‍ കാലത്ത് നാട്ടിലെത്താന്‍ കഴിയാതെ പ്രയാസമനുഭവിക്കുന്നു.

എസ്.എസ്.എല്‍.സി പരീക്ഷാനടത്തിപ്പിന് ദ്വീപിലെത്തിയ അധ്യാപകരെ അധികൃതര്‍ പ്രത്യേക കപ്പല്‍ സര്‍വിസ് നടത്തി തിരികെ എത്തിച്ചു.

 

ചികിത്സക്കും മറ്റും എത്തി കുടുങ്ങിയ ദ്വീപുകാരെ പ്രത്യേക കപ്പല്‍ സര്‍വിസ് വഴി ദ്വീപ് ഭരണകൂടവും നാട്ടിലെത്തിച്ചു. എന്നാല്‍, ദ്വീപില്‍ കുടുങ്ങിയ മറ്റു മലയാളികളുടെ കാര്യത്തില്‍മാത്രം നടപടിയൊന്നുമുണ്ടായില്ല.

തങ്ങളെ നാട്ടിലെത്തിക്കാന്‍ വഴിയൊരുക്കണമെന്നാവശ്യപ്പെട്ട് ഇവര്‍ കവരത്തി ഡെ. കലക്ടര്‍ ടി. കാസിം, എസ്.പി നിധിന്‍ വല്‍സന്‍ എന്നിവരെ സമീപിച്ചിരുന്നു. എന്നാല്‍, കേരളാ ഗവണ്‍മെന്റാണ് ഇക്കാര്യത്തില്‍ മുന്‍കൈ എടുക്കേണ്ടത് എന്ന മറുപടിയാണ് ലഭിച്ചത്.

 

ലക്ഷദ്വീപ് എം.പി മുഹമ്മദ് ഫൈസല്‍ പി.പി ഉള്‍പ്പെടെയുള്ള പ്രമുഖര്‍ തങ്ങളുടെ സഹായത്തിനെത്തുന്നത് ആശ്വാസം പകരുന്നുണ്ടെന്ന് കുടുങ്ങിക്കിടക്കുന്നവര്‍ പറഞ്ഞു.ദ്വീപില്‍ കുടുങ്ങിയവര്‍ക്ക് ലക്ഷദ്വീപ് ഭരണകൂടം താമസ പെര്‍മിറ്റ് പുതുക്കി നല്‍കുന്നുണ്ട്. 

പക്ഷേ, റൂം വാടകയും ഭക്ഷണവും ഉള്‍പ്പെടെയുള്ള ഭാരിച്ച ചെലവ് താങ്ങാന്‍ പറ്റാത്ത അവസ്ഥയാണ്.