മാഡ്രിഡ്: കോപ ഡെല്‍റേയില്‍ നടന്ന എല്‍ക്ലാസികോയിലെ പരാജയത്തിന്റെ ക്ഷീണം മാറും മുമ്പ് റയല്‍ മാഡ്രിഡിന് വീണ്ടും തോല്‍വി. ലാലിഗയില്‍ കഴിഞ്ഞ ദിവസം നടന്ന എല്‍ ക്ലാസിക്കോയില്‍ എതിരില്ലാത്ത ഒരു ഗോളിനാണ് ബാഴ്‌സലോണ റയല്‍ മാഡ്രിഡിനെ പരാജയപ്പെടുത്തിയത്. ലാലിഗ സീസണിലെ രണ്ടാം എല്‍ക്ലാസിക്കോയായിരുന്നു ഇന്നലെ നടന്നത്. ബാഴ്‌സലോണയുടെ ഹോം ഗ്രൗണ്ടില്‍ നടന്ന ആദ്യപാദ മത്സരത്തില്‍ 5-1ന് ബാഴ്‌സലോണ റയലിനെ ഗോളില്‍ മുക്കി വിട്ടിരുന്നു. ഇതിന് പകരം വീട്ടാനും കോപ ഡെല്‍റേയിലെ തോല്‍വിയുടെ ക്ഷീണം മാറ്റാനുമെന്ന ലക്ഷ്യത്തിലായിരുന്നു സാന്റിയാഗോ ബെര്‍ണബ്യൂവില്‍ റയല്‍ മാഡ്രിഡ് ഇന്നലെ വീണ്ടും ഇറങ്ങിയത്. എന്നാല്‍ കണക്കുകൂട്ടലുകളെല്ലാം പിഴച്ചതോടെ റയല്‍ പരാജയം രുചിക്കുകയായിരുന്നു. 26-ാം മിനുട്ടില്‍ ഇവാന്‍ റാക്കിട്ടിച്ച് നേടിയ ഗോളിലായിരുന്നു ബാഴ്‌സ വിജയിച്ചത്. ഗോള്‍ മടക്കുന്നിതായി റയലിന്റെ വിനീഷ്യസ് ജൂനിയര്‍, കരീം ബെന്‍സേമ, അസെന്‍സിയോ, ഗരത് ബെയ്ല്‍, ലൂക്കാ മോഡ്രിച്ച് എന്നിവര്‍ ബാഴ്‌സയുടെ ഗോള്‍മുഖത്ത് തുടരെ അക്രമം അഴിച്ചുവിട്ടെങ്കിലും ലക്ഷ്യം കണ്ടില്ല. ഉറച്ചു നിന്ന ബാഴ്‌സയുടെ പ്രതിരോധ നിരയും ഗോള്‍കീപ്പര്‍ ടെര്‍ സ്റ്റീഗന്റെ നിതാന്ത ജാഗ്രതയുമായിരുന്നു റയലിന് ഗോള്‍ നിഷേധിച്ചത്. കോപ ഡെല്‍റേയിലെ പ്രകടനം ടെര്‍ സ്റ്റീഗന്‍ ഇന്നലത്തെ എല്‍ ക്ലാസിക്കോയിലും തുടര്‍ന്നതാണ് ബാഴ്‌സയുടെ വിജയത്തിന് തുണയായത്.

മികച്ച പ്രകടനം പുറത്തെടുത്ത് ബാഴ്‌സയുടെ ഓരോ നീക്കത്തിനും ചുക്കാന്‍ പിടിച്ച ലയണല്‍ മെസ്സിയാണ് കളിയിലെ താരം. ജയത്തോടെ ലീഗിലെ ര@ണ്ടാം സ്ഥാനക്കാരായ അത്‌ലറ്റികോ മാഡ്രിഡുമായുള്ള പോയിന്റ് അകലം 10 ആക്കി വര്‍ധിപ്പിക്കാനും ബാഴ്‌സയ്ക്കായി. 26 മത്സരങ്ങളില്‍നിന്ന് 60 പോയിന്റുമായാണ് ബാഴ്‌സ ലീഗില്‍ ഒന്നാം സ്ഥാനത്ത് തുടരുന്നത്. 25 മത്സരങ്ങളില്‍ നിന്ന് 50 പോയിന്റുമായി അത്‌ലറ്റികോ ര@ണ്ടാമതും 26 മത്സരങ്ങളില്‍ നിന്ന് 48 പോയിന്റോടെ റയല്‍ മാഡ്രിഡ് മൂന്നാം സ്ഥാനത്തുമാണുള്ളത്. മറ്റൊരു മത്സരത്തില്‍ എയ്ബര്‍ എതിരില്ലാത്ത ഒരു ഗോളിന് സെല്‍റ്റാ വിഗോയെ തകര്‍ത്തു.