ഫറോക്ക്: ബോണസ് പ്രശ്‌നം പരിഹരിക്കാത്തതില്‍ പ്രതിഷേധിച്ച് ഓട്ടുകമ്പനി തൊഴിലാളികള്‍ കമ്പനി ഉടമകളുടെ വീട്ടുപടിക്കല്‍ പെരുന്നാള്‍ ദിനത്തില്‍ ധര്‍ണ നടത്തി. സംയുക്ത സമരസമിതിയുടെ നേതൃത്വത്തില്‍ കൊടിയത്തൂര്‍, ചേവായൂര്‍, മാത്തോട്ടം എന്നിവിടങ്ങളിലാണു സമരം നടത്തിയത്.
ഹിന്ദുസ്ഥാന്‍ ടൈല്‍ ഉടമ എം.എ അബ്ദുറഹ്മാന്റെ കൊടിയത്തൂരിലെ വീട്ടുപടിക്കല്‍ നടത്തിയ സമരം ടൈല്‍ വര്‍ക്കേഴ്‌സ് യൂനിയന്‍ (സി.ഐ.ടി.യു) ജനറല്‍ സെക്രട്ടറി പി. പ്രവീണ്‍കുമാര്‍ ഉദ്ഘാടനം ചെയ്തു. നാരങ്ങയില്‍ ശശിധരന്‍ അധ്യക്ഷനായി. ഇ. ദിനേശന്‍, എം. സതീശന്‍, അരിക്കോത്ത് രാജന്‍, രമേശന്‍, പി. പീതാംബരന്‍, ടി. രാമചന്ദ്രന്‍ സംസാരിച്ചു.
നാഷനല്‍ ടൈല്‍സ് ഉടമ പി.കെ അബ്ദുല്ലക്കോയയുടെ മാത്തോട്ടത്തെ വീട്ടുപടിക്കല്‍ നടത്തിയ സമരം ടൈല്‍ വര്‍ക്കേഴ്‌സ് യൂനിയന്‍ (സി.ഐ.ടി.യു) ട്രഷറര്‍ എന്‍. മധു ഉദ്ഘാടനം ചെയ്തു. മുരളി അധ്യക്ഷനായി. എം. വാസുദേവന്‍, എം.എം മുസ്ഥഫ, പ്രദീപന്‍, വേലായുധന്‍, രാമദാസന്‍, ബാബു, ഗിരീഷ്, എം. ഗണേഷന്‍ സംസാരിച്ചു.