പാരിസ്: ഗോളടിച്ചതിന് ശേഷം വ്യത്യസ്തമായ ഗോള്‍ സെലിബ്രേഷനുമായി ഇറ്റാലിയന്‍ താരം ബലോട്ടെല്ലി. ഫ്രഞ്ച് ലീഗില്‍ കഴിഞ്ഞ ദിവസം നടന്ന മത്സരത്തിലായിരുന്നു വ്യത്യസ്തമായ ആഘോഷം നടന്നത്. മാഴ്‌സലെ താരമായ ബലോട്ടെല്ലി സഹ കളിക്കാര്‍ക്കൊപ്പം ആഹ്ലാദം പങ്കിടുന്ന ട്വിറ്റര്‍ വിഡിയോ പോസ്റ്റ് ചെയ്തായിരുന്നു ആഘോഷിച്ചത്. സയന്റ് എറ്റിനെക്കെതിരേയുള്ള മത്സരത്തില്‍ രണ്ടാം ഗോള്‍ നേടിയപ്പോഴായിരുന്നു വിഡിയോ ആഘോഷം നടന്നത്. ഗോളടിച്ചതിന് ശേഷം പോസ്റ്റിന്റെ പിറകില്‍ വിഡിയോ കാമറയുമായി നിന്നിരുന്ന ആളില്‍ നിന്ന് ഫോണ്‍ വാങ്ങി സ്വന്തം ട്വിറ്റര്‍ അക്കൗണ്ടിലാണ് വിഡിയോ പോസ്റ്റ് ചെയ്തത്.

സംഭവം കായിക ലോകം ഏറ്റെടുത്തതോടെ ആഘോഷം വൈറലാവുകയായിരുന്നു. ഇതിന് മുമ്പും ഇത്തരത്തില്‍ സെലിബ്രേഷന്‍ നടന്നിരുന്നു. 2015ല്‍ റോമ താരം ഫ്രാന്‍സിസ്‌കോ ടോട്ടി ഗോള്‍ നേടിയപ്പോള്‍ സ്വന്തം ഫോട്ടോ സോഷ്യല്‍മീഡിയയില്‍ അപ്‌ലോഡ് ചെയ്ത് ആഘോഷിച്ചിരുന്നു.