തിരുവനന്തപുരം: എസ്.എസ്.എല്‍.സി, പ്ലസ്ടു വിഭാഗങ്ങളില്‍ ഇതുവരെ പൂര്‍ത്തീകരിച്ച പരീക്ഷകളുടെ മൂല്യനിര്‍ണയം സംബന്ധിച്ച സര്‍ക്കാര്‍ നിര്‍ദേശം അപ്രായോഗികമെന്ന് അധ്യാപകര്‍. മൂല്യനിര്‍ണയം ഈ മാസം 13ന് ആരംഭിക്കുമെന്ന് കഴിഞ്ഞദിവസം മുഖ്യമന്ത്രി പ്രഖ്യാപിച്ചിരുന്നു. എന്നാല്‍, ഇത് പ്രായോഗികമല്ലെന്നാണ് അധ്യാപകര്‍ പറയുന്നത്.
മെയ് 13ന് മുന്‍പ് പൊതുഗതാഗതം ആരംഭിക്കില്ലെന്നതാണ് പ്രധാന പ്രശ്‌നം. എസ്.എസ്.എല്‍.സിക്ക് നിലവില്‍ 54ഉം ഹയര്‍സെക്കന്‍ഡറിക്ക് 94ഉം മൂല്യനിര്‍ണയ കേന്ദ്രങ്ങളാണുള്ളത്. പൊതുഗതാഗത സംവിധാനം ഇല്ലാത്തതിനാല്‍ മൂല്യനിര്‍ണയ കേന്ദ്രങ്ങളിലേക്ക് അധ്യാപകര്‍ക്ക് എത്തിച്ചേരാന്‍ കഴിയില്ല.
മൂല്യനിര്‍ണയം സമയബന്ധിതമായി പൂര്‍ത്തിയാക്കുന്നതിന് ആവശ്യമായ സൗകര്യങ്ങളൊരുക്കണമെന്ന് എ.കെ.എസ്.ടി.യു സംസ്ഥാന കമ്മിറ്റി ആവശ്യപ്പെട്ടു.